Квартет виолончела „Растрели“ во „Св. Софија“

На „Охридско лето“ вечерва во 21 часот, во црквата „Св Софија“ концерт ќе одржи квартетот виолончела „Растрели“, кој го сочинуваат музичарите: Кира Кравцов, Кирил Тимофеев, Миша Дегтјарев и Серџо Драбкин

Овој уникатен ансамбл ја воодушевува публиката со своите нетрадиционални програми од 2002 година кога е и основан. Неговите членови го формирале со мисија да изведуваат музика „помеѓу жанрови“ така да широк репертоар им содржи дела од Бах, Фрескобалди и Дворжак, до дела на Џорџ Гершвин, Дејв Брубек и Чик Кореја.

Името на квартетот доаѓа од архитектот Бартоломју Растрели, кој живеел во 18-от век и го проектирал „Ермитаж“ во Санкт Петербург, роден град на тројцата од членовите на квартетот.

Квартетот „Растрели“ досега настапувал во многу значајни европски концертни сали: „Гастајг“ во Минхен, салата ��а Филхармонијата на Санкт Петербург, во салата „Бугарија“ во Софија, „Лидерхале“ во Штутгарт и филхармониската сала во Минск. (К.Б.)