Ангелов прекомандуван во „двојка“

Претседателот на „Достоинство“, Стојанче Ангелов, повторно се жали на притисоци од МВР, односно дека членови на Здружението парично се казнуваат за да се замолчат. Полицаецот Ѓорѓи Николов од Кочани деновиве бил казнет со 15 проценти од платата во траење од шест месеци. Тоа му е втора казна.

„Ова е директна атака врз членовите на ’Достоинство‘. Но, никој нема да не' замолчи“, изјави вчера Ангелов. Тој соопшти дека колегите од Кочани се солидаризирале со Ѓорѓи и дека ќе собираат средства за да му ги надоместат парите што ќе му бидат одземани шест месеци. Ангелов праша дали ваквата казна е награда за Николов, кој во конфликтот во 2001 година ја бранеше Македонија. Ангелов додаде и дека казнетиот полицаец, за 30 години работен стаж, бил преместен да биде позорникар во ромската населба.

„И мене минатата недела ми дадоа задача да се возам во автобус на ЈСП број 2 и да внимавам да нема инциденти меѓу малолетници. Јасно е што значи тоа за мене“, истакна Ангелов.

Од МВР стигна реакција дека дисциплинските комисии на МВР постапуваат согласно со законот. „Воведувањето на принципот на одговорност за сопствените постапки подразбира неселективност, без разлика дали станува збор за член на некое здружение ’Достоинство’. Впрочем, и лидерот на Здружението не беше обвинет и осуден поради неговата улога во Здружението, туку поради сторено кривично дело“, стои во реакцијата на МВР. (Св.У.)