Ахмети не си замина

Лидерот на ДУИ, Али Ахмети, до вчера попладн�� не се одѕва на барањето на претседателот на Албанскиот сојуз, Валон Беља, да замине од политичката сцена. Беља во саботата му постави ултиматум на Ахмети во рок од 48 часа да си оди од политиката или во спротивно ќе ги објавел оригиналните досиеја со кои се докажувала неговата соработка со службите.

Откако вчера на пладне, без исход, истече ултиматумот, Беља реши да му даде уште една шанса на Ахмети и рокот го пролонгира за уште 12 часа, односно до полноќ. Ако и дотогаш не се повлечел, претседателот на новата партија на Албанците најави дека денеска, дефинитивно, ќе ги обелодени документите. Вицепремиерот Абдулаким Адеми вчера не одговори дали Ахмети планира да се повлече, туку, нарекувајќи го сателит на Мендух Тачи, му порача на Беља да си ја гледа „таканаречената партија“.

„Уште на промоцијата на таканаречената политичка партија ние констатиравме дека таа е нарачана. Тој е сателит на Тачи, кој се обидува да дискредитира политички личности, особено оние што во 2001 година успешно ја завршија борбата и победија. Би му сугерирал ако навистина сака да биде претседател на некоја партија да не се занимава со вакви ниски работи и со дискредитации, туку да ја промовира партијата и да понуди програма“, изјави вчера вицепремиерот Адеми.

Беља во саботата рече дека некој му оставил пред врата материјали за Ахмети и оти тоа биле оригиналните документи со кои се докажувала соработката на лидерот на ДУИ со тајните служби. Се' уште не се знае дали Беља планира да го предаде досието до Комисијата за лустрација.

Претседателот на Комисијата за лустрација, Томе Аџиев, вчера ни изјави дека не го добиле досието од Беља. „Ако ни го достави Комисијата ќе го разгледува и ќе заземе став, дали е тоа оригинално или не. Тој нешто најавува, што најавува не знаеме, досега немаме ништо. Се' додека не видиме, не можеме ништо да тврдиме“, вели Аџиев. (Св.У.)