Дивоградбите ќе прават проблеми

Градоначалниците имаат многубројни забелешки на предложениот закон со кој треба да се легализираат бесправните градби. И тоа од висината на надоместокот што треба да се плати за една дивоградба да добие правен статус, преку фактот дека законот не ги третира повисоките објекти, станбените згради и деловните објекти, па се' до очекуваните проблеми што ќе се јават при обезбедувањето имотни листови.

Генерално, градоначалниците бараат наместо предвидениот надоместок, за легализирање на дивоградбите да се плаќа надоместокот за комуналии што го утврдил Советот на општината.

„Нема потреба од вклучување на социјалниот елемент, особено за луѓе што го кршеле законот. Треба да се исфрли овој надоместок, а сопствениците на вакви објекти да имаат обврска да плаќаат надомест за уредување на градежно земјиште. Во тој случај, нема да е важно колкав е годишниот приход“, рече градоначалникот на Гостивар, Руфи Османи, на вчерашната јавна презентација на Предлог-законот. Тој смета дека е потребно да се зголемат и роковите од три на шест месеци за да им се овозможи на граѓаните кои привремено престојуваат во странство да ги легализираат своите објекти.

Решението да се плаќа надомест само за индивидуалните куќи, а не и за градбите од државен интерес, за градоначалникот на Карпош, Стевчо Јакимовски, може да доведе до проблеми од уставно-правен карактер, додека претседателот на ЗЕЛС и градоначалник на Скопје, Коце Трајановски, како клучен проблем го посочи решавањето на имотните проблеми кај оние граѓани што имаат објекти градени само врз основа на адвокатски договори, поради што не ќе можат да извадат имотен лист. (Б.А.)