Од Заев се „исплашија“ и Синдикатот и Унијата

Не стивнуваат реакциите откако медиумите ги пренесоа контроверзните делови од настапот на потпретседателот на СДСМ, Зоран Заев, пред партиското членство во Валандово. „Ако било така изјавено, тоа е целосно неприфатливо. Дури и да е кажано во шега, тоа не е говор за еден избран политички претставник“, оцени евроамбасадорот Ерван Фуере. Според него, ако изјавите се точни, тие го отсликуваат ниското политичко ниво во државава, за што се одговорни сите партии. „Сметам дека сите политички учесници се свесни за големите предизвици со кои се соочува Македонија во создавањето професионална јавна администрација“, изјави Фуере.

Од опозициската партија се огласија со соопштение во кое посочија дека немаат никаква намера на каков било начин да се пресметуваат со администрацијата. „СДСМ се залага за департизирана, професионална и високообучена администрација во која вработувањето, напредувањето и оценувањето ќе се одвива исклучиво според објективни критериуми за стручност, професионална надградба и чесност. Сите поинакви позиции и изјави ниту биле ниту се политика што ја застапува СДСМ“, се тврди во соопштението.

Изјавите на струмичкиот градоначалник, како што се „ќе јадеме живи луѓе“, „ќе бркаме од работа“, го кренаа на нозе Синдикатот. Со протестна нота вчера се огласи и СОНК, од каде што оценија дека изјавите на Заев претставувале навреда за сите граѓани и биле „длабоко антицивилизациски и антиевропски“, како и спротивни на Уставот и на законите.

„СОНК е вчудоневиден како еден толку висок партиски функционер во 21 век поттикнува канибализам и сосема е нормално да бидеме згрозени од таквата нечовечна и срамна изјава“, се наведува во реакцијата. Од СОНК велат дека нема да дозволат некој да биде бркан од работа поради партиска припадност или политичка определба, „ниту, пак, да биде мени за налудничави амбиции на толку висок политички функционер“. Владејачката СПМ ги повика надлежните институции да го анализираат говорот и да оценат дали во него има елементи за кривично гонење.

Од СДСМ, пак, наведоа дека самиот Заев јавно изразил жалење и извинување за различните интерпретации на неговиот јавен настап и појаснил дека станува збор за тенденциозна монтажа, со цел да се остави погрешен впечаток и контекст, а за да му се нанесе штета на угледот на партијата. (П.Р.)