Нове Франговски изложува во Софија

Во престижната галерија „Средец“ во Софија, во понеделник 8 ноември во 18 часот ќе биде отворена изложба на современиот македонски сликар Нове Франговски , во организација на тамошниот Културно-информативен центар на Македонија, во соработка со Националната галерија и Министерството за култура на Република Македонија.

Пред бугарската публика Нове Франговски за прв пат самостојно ќе се претстави со дела од различни периоди на своето творештво, а изложбата ќе ја отворат македонскиот заменик-министер за култура, Драган Недељковиќ и бугарскиот Димитар Дерелиев.

Самостојниот уметник Нове Франговски е роден во Галичник 1939 год. Дипломирал на Академијата за ликовни уметности(оддел сликарство) во Белград, а специјализирал на Академијата за убави уметности во Рим, Италија. Во 1990 година ја оформил, и раководи со Интернационалната ликовна колонија – Галичник. Работи како самостоен уметник.Во земјата и странство досега се претставил со над дваесет самостојни изложби. Со свои дела учествувал на над 150 изложби во земјава, а изложувал и во Турција, Франција, САД, Велика Британија, Германија, Грција, Романија и др.

Повеќе пати е наградуван, а добитник е и на наградите: „25 години АСНОМ“, „Нерешки мајстори“ и „Никола Мартиноски“. (К.Б.)