Насловна

Пријава за прилепски хирург

ПРИЛЕП - Прилепски хирург, истакнат член на општинската организација на СДСМ, в.д. директор на градската болница во Прилеп во период од 2003 до 2006 година, е осомничен за злоупотреба на службена должност и овластување. Како што вчера соопшти СВР-Битола, Д.Б. (52) во текот на 2006 година извршил набавка на реагенси за сума над еден милион денари потребни за болничката биохемиска лабораторија. Набавката ја извршил без да спроведе јавна постапка и потпишал договор кој бил во корист на добавувач од Скопје. Истата година за да избегне постапка за набавка по отворен повик, извршил 13 посебни набавки од мала вредност на т.н. „минивидас“ тестови во вредност над еден милион денари од добавувач од Скопје.

Според полициското соопштение, осомничениот хирург во предистражната постапка изјавил дека не е спроведена постапка во согласност со Законот за јавни набавки, затоа што фирмата-добавувач од Скопје била ексклузивен застапник на производите од палетата на „минивидас“ тестовите. Меѓутоа, во наредниот период друга раководна гарнитура извршила набавка на истите реагенси според Законот за јавни набавки, при што е спроведена постапка по пат на отворен повик. (Мн.Т.)