Владини емисари како новинари во Брисел

На Владата не и' е доста да ги контролира информациите во медиумите во Македонија, па амбициозно тргнува во освојување на медиумскиот простор во Брисел, испраќајќи си своја дописничка под етикетата МИА. Она што го прави деновиве МНР за новата дописничка излегува од рамките на се' што е видено досега во македонското новинарство и, дефинитивно, ја трга маската од МИА како јавен сервис, претворајќи ја најтранспарентно во агенција на Владата.

Како што дознаваме неофицијално, со допис од МНР, амбасадите во Брисел добиле задача да и' најдат стан и да ја пречекаат новата дописничка, процедура што не ја бараат ни за амбасадорите, а во игра била и опцијата да и се даде просторија во некоја од амбасадите, за која брзо сфатиле дека е апсурдна.

Неофицијално, МНР најавило дека ќе и' излезе во пресрет на дописничката Маја Балевска и ќе и' даде службен пасош, па со таков документ амбасадите треба да и' помогнат да добие акредитација во ЕУ, настапувајќи во исто време како независен новинар и државен службеник! Тоа значи дека, ако се оствари најавата, скандалот нема да стане јавен само во Македонија туку и во ЕУ, бидејќи според правилата за акредитирање на новинари во Белгија, нема шанси новинар да биде и нешто друго, а најмалку, пак, да работи за државата.

Да биде покуриозитетно, Маја Балевска е штотуку вработена и токму за ова работно место во МИА, односно нема новинарско работно искуство, па дури сега интензивно се тренира. Нејзиното именување, по се' изгледа, нема да биде единствено, бидејќи се навестува дека Владата подготвува дописник и од Стразбур, кој ќе известува за „големите успеси“ на Македонија како претседавач со Советот на министрите на Советот на Европа.

Јавна тајна е дека трошоците за новинарите известувачи од сите официјални посети ги плаќа директно Владата, а истото тоа важи и за ова најавено дописничко место, иако треба да си го плаќа сама МИА. Во моментов ниту еден јавен сервис во Европа не си дозволува ваква очигледна врска со Владата, ниту, пак, една македонска влада досега си дозволуваше да демонстрира ваква зависност на новинарството од неа. Тоа е спротивно на сите пораки од Европската унија за слобода на медиумите. (Н.Р.)