Новини во вакцинирањето

Вакцината против морбили, рубеола и паротит (МРП) место на седумгодишна возраст ќе се дава на шест години, дитепер, хип и полио вакцина децата ќе примаат еден месец порано, односно место на три месеци на полни два месеца, а на 14 години нема да се прима ревакцина против туберкулоза. Ова се дел од новините што ги содржи новиот Правилник за имунизација, донесен пред еден месец, со кој се воведување и посовремена евиденција на вакцинацијата на децата.

На Клиниката за детски болести во Скопје се формира стручен тим, кој ќе ги утврдува трајните контраиндикации од вакцинацијата и кои деца треба да ги примаат поскапите ацелуларни вакцини со помалку нусефекти. Раководителот на Секторот за превентивна здравствена заштита при Министерството за здравство, Јованка Костовска, вчера изјави дека новина е што на 14 години веќе нема да се дава вакцината против туберкулоза, затоа што повеќе години светот предупредува дека за оваа болест е најважна вакцинацијата на децата првиот месец по раѓањето. Вакцината МРП сега ќе се дава на шестгодишна возраст, со цел да се заштитат децата од ова заразно заболување пред да влезат во колектив.

Парите од програмата за вакцинација годинава ќе бидат намалени за 100.000 денари на сметка на вакцината против хуман папулома вирус, која годинава нема да се набави, зашто има околу 50.000 дози неискористени, кои се со рок на траење до 2013 година. (Ј.Ј.)