Преспа очекува реализација на „Аквапура“

РЕСЕН - Изградбата на туристичкиот летен центар „Аквапура“ на брегот на Преспанското Езеро е активен проект. „Општина Ресен очекува одговор од португалскиот инвеститор“, изјави градоначалникот Михаил Волкановски.

„Локалната самоуправа писмено се обрати пред еден месец до сопствениците во Португалија. Ги поканивме да разговараме за надминување на проблемите и за почнување на овој важен проект“, нагласи ресенскиот градоначалник.

Волкановски се пожали дека на локацијата во Отешево, каде што треба да се гради „Аквапура“, нема никакви активности. Просторот е запуштен и обраснат со вегетација, како да нема свој газда.

Од Општина Ресен најавуваат дека по завршување на големата акција за уредување на плажите на брегот на Преспанското Езеро, ќе почнат да ги издаваат под концесија. За стопанисувањето со плажите под концесија ќе биде изработен посебен правилник. (Д.Р.)