Забрана за бразилската депилација
Според зборовите на стручњаците за нега на кожата, бразилската депилација е опасна
Американската сојузна држава Њу Џерси одлучила да воведе контрола во подрачјето на бикини-зоната. Имено, сојузниот Одбор за козметика и фризирање планира да ја забрани бразилската депилација по пријавата на две жени за нарушено здравје во текот на „потрагата“ по мазно меѓуножје.
„Двете жени се хоспитализирани поради тежок вид инфекција, здобиена по депилирање со восок на чувствителните подрачја. Едната од нив има поднесено и тужба“, изјавил Џеф Лам, портпарол на Здружението за заштита на потрошувачите, кое ја надгледува работата на Одборот за козметика и фризирање.
Депилацијата на гениталните подрачја, технички, никогаш не била дозволена со закон. Подрачјата што смеат да се депилираат, според законот, се лицето, вратот, абдоменот, нозете и рацете, но бидејќи бразилската депилација не е прецизно дефинирана, никој не се ни заморувал со надгледување на работата на козметичките салони.
„Подрачјето на меѓуножјето не е дел од абдоменот, како ни дел од нозете, како што сметаат некои и поради што веруваат дека бразилската депилација е дозволена со закон“, истакнува Лам.
Функционерите од Националната козметичка организација и Националниот совет на сојузните одбори за козметика наведуваат дека Њу Џерси ќе стане првата држава во САД која ќе го забрани депилирањето на гениталното подрачје. Со новиот закон, класичната депилација на бикини-зоната ќе остане дозволена.
Според зборовите на стручњаците за нега на кожата, бразилската депилација е опасна, зашто врелиот восок може да ја иритира или оштети чувствителната кожа на подрачјето на меѓуножјето, а постои опасност и од разни инфекции, поткожни влакна и алергии.
Но, и покрај ризикот, милиони жени, но и мажи, ги избираат токму тој начин на уредување на своите „приватни подрачја“, а просечната цена на бразилска депилација во САД се движи околу 50 долари.
Доколку Сојузниот одбор за козметика на својата идна седница донесе забрана за депилација на гениталните подрачја, таа ќе стапи во сила веќе во мај годинава, а козметичките салони што нема да се придржуваат до одредбата ќе бидат санкционирани со парична казна. За сопствениците на салоните за разубавување, укинувањето на оваа популарна услуга, веројатно, ќе значи осетен пад во работењето, особено зашто забраната доаѓа со првите денови на летото и сезоната на костими за капење.
Сопственичката на еден таков салон проценува дека во 2008 година кај неа за бразилска депилација дошле над 1.800 жени.
„Тоа е голема работа и извор на добра заработувачка. Подрачјето на бикини-зоната е приватност на моите муштерии и сметам дека никој не би требало да решава наместо нив. Всушност, муштеријата секогаш е во право“, заклучува сопственичката на слонот и додава дека по оваа „нечесна забрана“ жените ќе побараат средување на бикини-зоната надвор од границите на Њу Џерси. |
