Двајца затвореници избегаа од затворот „Идризово“

Двајцата осуденици што ги издржуваа казните во Казнено-поправната установа „Идризово“ вчераутро успеале да побегнат од најголемиот затвор во државава. Бегството на Рајмондо Усаин од Скопје, осуден на затворска казна во вкупно траење од 1,6 година за две тешки кражби и на Оливер Којчев од Кавадарци, осуден за лажно пријавување и тешка телесна повреда, на казна затвор во траење од 2 години и 5 месеци, се случила во пет часот наутро.

Осудените, според официјалната потврда на Дирекцијата за извршување санкции, најнапред ја избиле решетката од прозорецот на бањата во објектот Училиште, а потоа со употреба на дрвена талпа успеале да го прескокнат ѕидот на Казнено-поправниот дом „Идризово“.

Нивното бегство било регистрирано еден час по настанот, односно по прегледување на видеоматеријалот снимен од камерите. По ова, била започната проверка и пребарување на пошироката околина, на затворениот дел, но и на другите објекти во затворот.

Од Дирекцијата за извршување санкции потврдуваат дека осудениот Усаин во КПУ „Идризово“ е од пети мај оваа година, а Којчев со издржување на казната започнал на четврти септември минатата година.

Управата на КПУ „Идризово“ презела мерки и за службените лица што биле на стражарските места каде што се случило бегството и тие вработени сега се суспендирани.

За бегството затворската управа го информирала МВР, а увид извршиле истражен судија и јавен обвинител. (Љ.С.)