На ревизија сите одобрени учебници

Ревизија на сите одобрени учебници што моментално се применуваат. Ревизијата на учебниците од прво до петто одделение ќе ја направат педагошките факултети во Скопје, Штип, Битола и во Тетово, а ревизијата на останатите учебници од основното образование ќе ја направат Националната комисија за учебници, Бирото за развој на образование и експерти од факултетите во Македонија, професори и доктори на науки. Ревизијата на сите учебници ќе биде направена во рок од 30 дена по формирањето на тимовите за ревизија.

Ова завчера го соопшти министерот за образование и наука, Никола Тодоров, и додаде дека оваа одлука била донесена на вонреден состанок по негово барање пор��ди настанатата ситуација со учебниците и учебникарството во Македонија. На состанокот присуствувале претставници на Националната комисија за учебници, Педагошката служба и Бирото за развој на образованието.

„Ревизорните тимови ќе почнуваме да ги екипираме од понеделник, и тие ќе бидат формирани до кр��јот на неделата“, рече Тодоров.

Донесена е одлука да се изврши и јазична лектура на сите учебници од страна на Институтот за македонски јазик „Крсте Петков Мисирков“- Скопје, исто така, во рок од 30 дена.

На состанокот, како што рече Тодоров, донесен е заклучок Министерството за образование и наука да предложи до Владата законски измени на Законот за учебници за основно и за средно образование.

„Значително зголемување ингеренции на Националната комисија за учебници и овозможување на оваа Комисија на своите седници да расправа за рецензиите на учебниците, да ги прифаќа или да ги отфрла, како и да може да го распушти рецензентскиот тим и веднаш да формира тим за суперрецензија“, рече Тодоров.

Министерот Тодоров информира дека се договориле и за критериумите за тоа кој може да биде автор на учебник. „Автор на учебник не може да биде лице што нема минимум десет години искуство во предавање на предметот по кој се прави учебникот. Покрај останатите услови предвидени во законот, како и да има високо образование и да биде магистер или доктор на науки“, истакна Тодоров.

На состанокот е донесен и заклучок за предложување законски измени во однос на критериуми што треба да исполнува рецензентот. Едногласно беше усвоено, како што рече Тодоров, претседателот да биде доктор на науки, да биде професор на еден од факултетите, а другите двајца членови да бидат професори по конкретниот предмет, во основно или во средно образование. (МИА)