Светиклиментовиот универзитет ќе почне да се гради во септември

Охрид - За дваесеттина дена на просторот кај Плаошник ќе започне да се гради комплексот Климентов универзитет. Овој објект е осмислен како мултимедијален, високообразовен наставно-научен центар во кој ќе бидат сместени Светиклиментовата книжевна академија и македонскиот институт за хуманистички науки со мисија да обезбедува континуирано проучување на цивилизациите, културите и религиите што постоеле на овие простори во минатото. Ќе бидат изградени 14 објекти за конаци, Богословски факултет, Светиклиментова библиотека, каде што за почеток ќе има 100.000 книги, галерија на икони, музеј каде што ќе бидат презентирани сите пронајдени а��тефакти, Светиклиментова конзерваторска школа, академија и седум депанданси на светски универзитети. Ќе претставува центар на современ научно- просветен процес што ќе треба да ги задоволи потребите на македонскиот и на регионалниот образовно научен живот.

На присутните им се обрати премиерот Никола Гр��евски, кој, меѓу другото, истакна дека „одлуката на Владата на Република Македонија да го возобнови комплексот Светиклиментов универзитет е поттикната од намерата да му се оддаде должно признание на Свети Климент, како еден од најголемите словенски просветители и епископи. Иницијативата, истакна Груевски, значи заокружување на една монументална културно-просветителска и историска содржина и исклучителен културно-историски простор, кои се од капитално значење за македонскиот народ. Овој потфат има специфична културно-историска мисија да изведе хронолошки спој на светеклиментовиот дух и современото време, да го спои црковното со световното живеење и работење, токму овде на Плаошник во Охрид, во близина на Светиклиментовата црква ’Свети Пантелејмон‘ и Самоиловата тврдина“.

„Истражувачките работи на Плаошник исто како и реставраторско-конзеравтоските работи, се во завршна фаза. Фирмата што ќе гради на Плаошник е одбрана и затоа се надеваме дека во иднина се' ќе се одвива без проблем“, изјави Паско Кузман, директор на Управата за културно и историско наследство.

Со промоција на книгата „Ohrid Sub Specie Aeternitatis“ од Елизабета Димитрова и Паско Кузман, викендов беше означен почетокот на научно-наставната и културолошка дејност во рамките на комплексот Светиклиментов универзитет на Плаошник во Охрид.

Делото го промовираше министерката за култура Елизабета Канческа-Милевска, која рече дека „книгата претставува возбудливо и поетично патување низ историјата, културата, уметничките отстрели и креативните модели на Охрид, како водечки културен центар во Македонија и на Балканот“.

Коавторот на книгата, директорот на Управата за заштита на културното наследство, Паско Кузман, појасни дека во рамки на Светиклиментовиот универзитет на Плаошник ќе бидат сместени повеќе културни и научни институции, со галерија на икони, библиотека, како и дел од старите ракописи со кои располага охридскиот Завод и музеј. „Очекуваме во првата половина на идниот месец да биде поставен камен-темелникот на објектот“, истакна Кузман. Во врска со суштинскиот, функционалниот односно содржинскиот дел на проектот, Кузман рече дека во рамки на Универзитетскиот комплекс ќе функционира редовна конзерваторска школа, со професори од признати светски универзитети, музеј на почвата на Плаошник во кој ќе бидат презентирани богатите наоди на самиот археолошки локалитет, богата Светиклиментова библиотека со стартни сто илјади наслови, седиштето на Галеријата со икони, Македонскиот институт за хуманистички науки, посебен монашки простор наменет за свештени лица, афилијации на светски универзитети, како и Светиклиментова градина како место за одмор и креативна инспирација. (Н.П.- Мк.Т.)