Битолчани ги враќаат шпоретите на дрва

БИТОЛА - Скапотијата ги враќа шпоретите на дрва во битолските домови. Високата цена на струјата и на мазутот за парно греење ја зголеми побарувачката на огревно дрво за оваа сезона за цели 30 проценти, потврдуваат од битолската експозитура на „Македонски шуми“. Цената на еден кубен метар огревно дрво се движи од 2.300, па се' до 2.700 денари кај индивидуалните продавачи.

Само до крајот на јули „Македонски шуми“ испорачало 7.000 просторни метри дрвја до своите потрошувачи во Битола. Градот, според процените на претпријатието, има потреба годишно од 60.000 просторни метри дрвја.

„Се бараат и дабот и буката. Цената е 2.454 денари за дабот и 2.373 денари за буката. Имаме и сеченица, таа се продава по 1.711 денари“, вели Мирјана Божиновска од „Македонски шуми“ во Битола.

Според претпријатието, цената на огревното и техничкото дрво годинава не е променета. Од септември „Македонски шуми“ со новина - ќе започне со продажба на брикети. Цената за нив не е формулирана, но од претпријатието се надеваат дека тие ќе најдат свое место на пазарот, особено во колективните згради, бидејќи пакувањето за нив е практично, а искуството од западните земји покажало дека овој огревен материјал е доста користен во домаќинствата.

Засега во складиштата на „Македонски шуми“ има доволно брикети за потребите на битолчани. (А.Б.)