ДЕЦАТА НА МАЈКЛ ЏЕКСОН

Сонуваат за слава

И покрај настојувањата на славниот татко да ги зачува подалеку од очите на јавноста, децата на починатиот крал на попот Мајкл Џексон, во интервјуто со Опра Винфри изјавија дека еден ден би сакале да бидат познати и славни.

На американската ТВ-водителка Опра Винфри и' појде од рака да влезе во домот на семејството Џексон, една и пол година по смртта на славниот пејач и првпат да направи ексклузивен разговор за некој медиум со неговите деца: Парис, Принц и Бланкет.

„Би сакала да станам актерка кога ќе пораснам. Понекогаш импровизирам нешто самата, а порано го правев со тато тоа“, открила 12-годишната ќерка на Мајкл Џексон, Парис, додека нејзиниот брат Принц, една година постар од неа, сака да стане филмски режисер и продуцент. Опра Винфри освен на иднината, се осврнала и на минатото, па ги прашала наследниците на големата ѕвезда како се чувствувале кога татко им ги терал да носат маски на лицето во јавноста.

„Нашиот татко се обидуваше да не' воспитува така што не знаеме кој е тој. Но, тоа и не му појде од рака. Не беше толку пријатно да се носат тие маски, но ја почитувавме неговата желба да не' заштити“, објаснила ќерката на Мајкл Џексон.

Без оглед на тоа колку неговото однесување им изгледало бизарно за другите, децата на Мајкл Џексон се согласуваат во оцената дека бил прекрасен татко.

„Мислам дека никој не разбира дека беше добар татко и мислам дека беше најдобриот готвач на светот. Беше сосема нормален и освен што беше најдобар татко, правеше и најдобри пржени лепчиња на светот“, кажала Парис Џексон.