Последна шанса за Ахмети и за Груевски

ДУИ се' уште се надева на деблокада на евроатлантските процеси

Александра М. Митевска


Ретко кој очекуваше поинаков одговор од лидерот на ДУИ, Али Ахмети, кој по средбата со амбасадорот на САД, Филип Рикер, објави дека нема намера да ја напушти коалицијата со ВМРО-ДПМНЕ. По сите критични епизоди со среќен епилог меѓу коалициските партнери можеше да се претпостави дека Ахмети и овој пат ќе му прогледа низ прсти на премиерот Никола Груевски. Тие двајцата во јуни, веројатно, „коалициски“ ќе ја дочекаат одлуката на ЕУ за македонскиот датум за преговори. Можеби нема да се разделат ниту до самитот на НАТО во ноември... Но, што ако и потоа не се случи расплет во македонската евроатлантска драма ?

„Ако ДУИ ја напушти коалиција, тоа воопшто нема да придонесе за решавање на спорот со името и на внатрешните проблеми на земјата. ДУИ не сака да отвора криза, туку се залага за дијалог. Ако излеземе од Владата што ќе правиме, ќе стапиме во штрајк со глад или ќе протестираме пред институциите“. Со овие зборови Ахмети го оправда останувањето во Владата, неколку дена по неговата средба со опозицискиот лидер Бранко Црвенковски, на која, пак, и' претходеше ултиматумот до Груевски за решавање на статусот на припадниците на ОНА и за затворање на случајот „Сопот“ и на предметите вратени од Хаг.

Упатените во случувањата во албанскиот блок тврдат дека ДУИ се соочува со се' поголемо незадоволство на членството поради конструктивниот однос кон ВМРО-ДПМНЕ и оти постепено ја губи поддршката на теренот. Но, тоа како да не го вознемирува водството на партијата, која и натаму е комотна во власта поради предноста што се' уште ја одржува и на листите на популарноста и во законодавниот дом.

Според професорот Мерсел Биљали, ДУИ се' уште се надева дека е можно решение на спорот со името, иако последните случувања околу тоа прашање не будат многу надеж за компромис. Од друга страна, како што посочува ��ој, ДУИ се соочува со голем притисок од своите гласачи и се создава впечаток дека таа се движи без компас, што може скапо да ја чини.

„И во случај ДУИ да излезе од власта, на вонредните избори што би следеле потоа би се соочиле со минимален одѕив, со бојкот. Без пробив во интегрирањето во НАТО и во ЕУ, не верувам дека има партија што може да излезе на избори“, оценува Биљали. Тој посочува дека партиите од албанскиот камп се во грч, соочени со политиката на ВМРО-ДПМНЕ која, од една страна ја води земјата кон економски колапс, а од друга страна константно троши пари за себерекламирање. Но впечаток е, наведува Биљали, дека таквата политика засега не наидува на поголем отпор, гласачкото тело како да е аморфно по тоа прашање.

„Тешко е некој сега да прогнозира каде е излезот од овој лавиринт во кој се наоѓа македонската политика и што ќе се случува по неколку месеци. Сега ДУИ да излезе од власта ќе се создаде уште поголема неизвесност“, коментира нашит соговорник, посочувајќи дека владејачката партија на Албанците требала да замине од коалицијата пред околу шест месеци. Односно пред или по самитот на ЕУ, на кој се пролонгираше одлуката за датумот за преговори за Македонија.

Аналитичарот Сефер Тахири смета дека одлуката на Ахмети да остане во власта е мотивирана од тесно-партиски интереси и е поддржана само од одредени кланови во партијата. Според него, позицијата на Ахмети и на ДУИ во Владата е многу слаба и тие не се фактори кои можат да влијаат на процесите на домашен терен, а уште помалку на интегрирањето на земјава во НАТО и во ЕУ. „Тие не можат да ги остварат ниту своите програмски определби, а да не зборуваме за реализирање на некои поголеми проекти или на некоја идеологија што би придонела за рамноправност меѓу Македонците и Албанците во земјава“.

Откако Ахмети му подаде рака за помирување на Груевски, Тахири не верува ниту дека премиерот ќе им излезе во пресрет на барањата што ДУИ ги „спакува“ во ултиматум до коалицискиот партнер по една тензична седница на партиското претседателство. „Мислам дека Груевски повторно ќе се оправда дека ’Сопот’ и хашките случаи не се дел од политичката агенда и дека тој не може да се меша во независноста на судската власт. Тешко дека ќе се реши и статусот на борците на ОНА, бидејќи Груевски е свесен дека евентуалното затворање на ова прашање ќе има одек меѓу неговите гласачи и ќе предизвика негативни реакции меѓу членството на ВМРО-ДПМНЕ“, оценува Тахири.

Според партиски извори, по престрелката во Радуша, откривањето бункер со оружје на Скопска Црна Гора и обидите за „оживување“ на ОНА, раководството на ДУИ си го поставило прашањето: „Како сега политички да се повратиме?“ Следел заклучок дека на потег е партнерот, на кого експресно му беа испорачани трите основни барања, чие решавање, според ДУИ, ќе овозможи враќање на довербата кај населението и намалување на тензиите на терен.

Лидерот на НД, Имер Селмани, викендов обвини дека постои таен договор меѓу Груевски и Ахмети, од кој најмногу штета ќе имале Албанците во Македонија. „Тие сигурно имаат договор, а тој договор е многу штетен за Албанците во Македонија, но е штетен и за самата држава. Одлуките на Владата, во која ДУИ партиципира, многу пати се во спротивност со нашиот принципиелен интерес, било национален, било државен. Да се остане во Владата без ниту една политичка понуда за надминување на ситуацијата во Македонија е многу штетно“, рече Селмани. (A.M.M.)