Министерот Коњановски во Кина

Во рамките на посетата на НР Кина министерот за одбрана, Зоран Коњановски, вчера оствари средба со генерал Џу Цаи Ху, заменик- претседавач на Централната воена комисија на Кина, со која претседава претседателот на НР Кина. За време на средбата министерот Коњановски изрази благодарност за принципиелната политика на НР Кина кон Република Македонија и за силната поддршка што Кина и' ја дава на нашата земја. Потенцирајќи дека приоритети на Република Македонија се евроатлантските интеграции, министерот за одбрана истакна дека како држава истовремено сакаме да градиме одлична комуникација и соработка со НР Кина.

На средбата на која присуствуваше и заменик-началникот на кинеската армија, од страна на генералот Цаи Ху беше потенцирана засилената воена соработка меѓу Република Македонија и НР Кина која, оваа година, се интензивираше со заедничките активности меѓу двете министерства и армии. Исто така, од страна на генералот Цаи Ху беше потенциран економскиот развој и индустрискиот раст на НР Кина.

Во насока на јакнењето и продлабочувањето на соработката беше разговарано за посетата на заменик-началникот на кинеската армија на Република Македонија, што треба да се случи во јуни оваа година.