Серена ја намачи и ја докрајчи Венус
Во сестринското четврт-финале, Серена Вилјамс во епска битка по два тај-брејка ја надигра постарата Венус
Во морето на маратонски мечеви на десетиот ден на УС Опен, исклучок не направија ниту сестрите Вилијамс. Сестринското четврт-финале ја промовираше последната полуфиналистка, а победа на домашниот гренд-слем ќе се обиде да оствари Серена Вилијамс. Помладата сестра Вилијамс, по мечот кој по квалитет и траење беше рамо до рамо со машките мечеви, успеа да дојде до победа против Венус. Мечот извонредно го отвори Венус, која веќе во третиот гем направи брејк и при водство од 5:4, сервираше за сет. Но, Серена успеа да се извлече, израмни на 5:5, и сетот беше решен во тај-брејк, во кој Серена успеа да надокнади 4:6 и на крајот да слави со 8:6.
И вториот сет беше решен како и првиот, во 13. игра. Серена, 4. носител на турнирот, се соочи со негатива од 2:5 и речиси во невозможна мисија, во тај-брејк излезе како победничка. Но, ништо не беше невозможно за помладата сестра Вилијамс, кој по многу пропуштени можности на Венус, успеа да стигне до прифатливи 4:6, а потоа да направи целосен пресврт и да слави со конечен резултат од 9:7.
„Се чувстував како да е финале на УС, беше толку тешко. Не можам да поверувам дека победив“, изјави Серена веднаш по мечот. Во полуфиналето ја очекува Русинката Динара Сафина, која во четврт-финалето беше подобра од Италијанката Флавија Пенета, совладувајќи ја со 2:0 во сетови, 6:2 и 6:3. Инаку, Серена Вилијамс и Динара Сафина досега играле четири пати меѓу себе, а Серена води со 3:1. Во второто полуфинале на женскиот дел од турнирот ќе се сретнат Србинката Јелена Јанковиќ и Русинката Дементиева.
|
