Петмина нови сведоци денеска ќе зборуваат за „Пајажина“

В понеделник се очекува последната група сведоци предложени од Обвинителството

Љубиша Станковиќ


Во Истражниот оддел за борба против организираниот криминал и корупција денеска продолжува распитот на сведоци за случајот „Пајажина“. Во својство на сведоци пред истражниот судија, а по предлог на јавниот обвинител, ќе се најдат петмина вработени во фирмите на „Перо Наков“.

Веќе в понеделник се очекува распит на последните сведоци, кои доаѓаат по пределот на тужителот, а истражната постапка ќе финишира со изработката на вештиот наод и мислење за материјално-финансиското работење на многубројните фирми од „Перо Наков“, за кои УЈП и Финансиската полиција кажаа дека станува збор за даночно затајување од неколку милиони евра.

Како што е познато, во минатиот петок Кривичниот совет на Основниот суд Скопје 1 донесе решение со кое на сите 14-мина притворени им го продолжи притворот за нови 30 дена, а мерката притвор останува во сила и за оние шестмина осомничени што засега се водат за недостапни, меѓу кои и синот на Велија Рамковски.

Незадоволни од ваквата одлука, бранителите на притворените најавија дека ќе ја обжалат одлуката на Кривичниот суд, барајќи Апелациониот суд да го укине притворот, односно на осомничените да им биде одреден куќен притвор.

Сепак, тешко е да се поверува дека Апелација ќе донесе решение што ќе се коси со одлуката на Кривичниот совет на скопска „единица“, бидејќи Јавното обвинителство и натаму смета дека постои опасност притворените да побегнат, да влијаат врз сведоците или дека ќе го повторат делото. Во прилог на ова говори и фактот дека истрагата се' уште не е завршена и дека од запечатена просторија на „Перо Наков“, исчезнаа 500 класери полни со документи, кои требало да се користат во кривичната постапка против осомничените.