„Бихаќска“ објави: Нема веќе фракции

Најголемата опозициска партија тврди дека настапува обединето

Соња Крамарска


Најтесното раководство на социјалдемократите завчеравечер се упати кон скопскиот ресторан „Лира“ да ја прослави Стара Нова година. Постарите членови на СДСМ тоа го викаат тест за единството на партијата, иако кај опозициската партија овие прослави секоја година на 13 јануари се долгогодишна традиција.

Дали случајно или намерно, неколку минути пред почнувањето на прославата, поранешниот партиски претседател Владо Бучковски во телевизиско интервју изјави дека по сите внатрешни разијдувања и судири, СДСМ е, конечно, обединет. „СДСМ е обединет како никогаш досега и подготвени сме да влеземе во изборна трка“, рече Бучковски.

„Бихаќска“ 8 веќе подолго време дава сигнали дека редовите се консолидирани. Првата два теста успешно се поминати: под раководство на Црвенковски социјалдемократите одржаа два успешни опозициски митинга што ја вознемирија ВМРО-ДПМНЕ. Веќе нема новинарски извештаи дека еден или друг член на потесното раководство е во судир со Црвенковски или во меѓусебен судир. Пораката што постојано се емитува од „Бихаќска“ е дека бродот вплови во мирни води управуван од Црвенковски.

Нема детали од завчерашната забава во „Лира“, кој играл до Црвенковски на популарното нареченото меѓу социјалдемократите „лидерско оро“. Внатрепартиските критичари велат дела лидерското оро е барометар за тоа кој е најблизок до Црвенковски, а кој е на „опашката“.

Ѓорѓи Спасов, партиски ветеран до кој минатата година од највисоко место во СДСМ беше адресирана критика дека е „платеник на други партии“, не верува дека во партијата настапило вистинско примирје.

„Можно е СДСМ да се обединила под идејата за побрза смена на власта, втората причина е дека партијата разви ефикасен систем за дисциплинирање, а тоа е сите што не мислат како Црвенковски се оставени на дното на партиската хиерархија. Но тоа не значи дека нема различни мислења“, вели тој.

Факт е дека во СДСМ како и во другите партии од македонското милје, всушност, никогаш немаше идеолошки фракции. Сите фракции настануваа поради персонални судири. „Поделбите се навистина зад нас. Јас отсекогаш велев дека судирите се една од главните причини за неуспехот на СДСМ“, вели поранешната партиска лидерка Радмила Шекеринска меѓу која и Бучковски своевремено се разви силно ривалство околу лидерската функција што буквално ја парализираше партијата и ја подели на два дела.

Политичките посматрачи најголемата заслуга за примирјето во СДСМ му ја даваат на Црвенковски. Тој е засега единствената фигура која успева да излезе на крај со тензиите во партијата и да се издигне како лидер, велат. Многумина застапуваат мислење дека ако Црвенковски во моментов дигне раце од СДСМ, ситуацијата повторно ќе експлодира.

„Фактот што наближуваат избори дејствува смирувачки врз таборите бидејќи секој сака да биде во добри односи со Црвенковски и да се најде на пратеничките листи“, коментира Никола Поповски, некогашна ѕвезда на социјалдемократскиот камп.

Анализите што дискретно ги прават внатрепартиските посматрачи се дека партиските „тешкаши“ како Илинка Митрева, Никола Поповски и Ѓорги Спасов треба повторно да ги активираат во партијата. Интервјуто што пред два месеци го направи „Утрински весник“ со некогашната социјалдемократска шефица на дипломатијата Илинка Митрева, ги урна рекордите по читаноста на интернет страницата. Несомнено, наиде како освежувачки бран до социјалдемократите од пониските ешалони кои со загриженост го следат развојот на настаните и стагнацијата на СДСМ наспроти парадерството на владејачката ВМРО-ДПМНЕ.

Присутните на завчерашната прослава велат дека расположението на партискиот врв било добро. Мезеле сармички, ајвар, полнети пиперки, а за експретседателот Глигоров, кој беше дел од прославата, лично се грижел Црвенковски, кој постојано му нудел храна од богатата трпеза. Инсајдери велат дека навистина изгледа како социјалдемократите да ги оставиле лошите денови зад нив.

„Не ни очекуваме во отворена дебата да покажат нетрпеливост едни кон други, но едно е што се зборува во меѓусебната комуникација, а друго се вистинските чувства“, вели Никола Поповски.

Сепак, фактот што СДСМ е исправен пред моќен непријател како што е сега ВМРО-ДПМНЕ, несомнено е силен мотив да престанат внатрешните кавги на СДСМ. Вообичаено е „фракциите“ да оперираат во услови кога нема други предизвици, но фактот што врз „Илинденска“ бб се дава целосен поглед од четвртиот кат на „Бихаќска“ 8 прави да престанат сите други муабети.