До крајот на шоуто уште четири недели, Александар пак изгласан од публиката
На 11. гала-вечер на „Операција триумф“ отпадна студентот Никола, а се номинирани Вукашин и Сајко
Ивона Саздовска
По пауза од една недела поради смртта на синот на Марина Туцаковиќ, член на жирито, реалното музичко шоу „Операција триумф“ се врати пред малите екрани.
Одржувањето на единаесеттата гала-вечер помина во знакот на студентите, номинациите, отпаѓањето на еден од кандидатите и, секако, веќе познатиот дел од емисијата, каде што нашиот претставник Александар Белов повторно беше најдобар според гласовите на публиката, па и оваа недела ќе ја дочека мирно во куќата.
Интересен е податокот дека до самиот крај на шоуто остануваат уште четири недели, со што конечно ќе се дознае која ќе биде новата балканска ѕвезда и за кого ова шоу ќе значи вистински чекор напред во музичката кариера.
Во почетокот на емисијата водителите укажаа на недостигот од еден член на жирито, иако во неколку наврати од продукцијата „Емоушн“ појаснија дека до новата гала би требало да се најде замена за Туцаковиќ. Во опција биле пејачката Маја Оџаклиевска и композиторот и музичар Александар Сања Илиќ, но, сепак, третото столче остана празно, при што за номинациите и за коментарите се погрижија останатите двајца членови Тончи Хулиќ и Исмета Крвавац. Притоа, беше посочено дека наскоро работите ќе се средат и дека жирито ќе биде во комплетен состав.
Од номинираните студенти Ана Бебиќ и Никола Пауновиќ, среќата не му се насмеа на „позитивниот“ рокер кој ќе остане запаметен по деветте номинации за отпаѓање и по коментарот на Марина дека никогаш нема да биде ѕвезда.
Сосема природно, по прогласувањето на резултатите, Никола истакна дека по толку обиди, конечно, му дојде редот да го напушти шоуто.
Од другите кандидати, на Александар му припадна честа да ја пее песната „Још ти се надам“ во дует со Емина Јаховиќ, додека како втор ексклузивен гостин на гала-вечерта се појави поранешната пејачка на групата „Магазин“, Јелена Розга.
Најпозитивно изненадување на вечерта беше најконтроверзниот кандидат Даниел Павловиќ, кој одлично ја интерпретираше ��есната „Хипнотизиран“ од Дино Дворник, а исто така пријатно изненади и босанскиот претставник Аднан Бабаиќ, кој ја изведе песната на Тоше Проески „Пратим те“ (По тебе), при што вториот дел го отпеа на македонски јазик, што предизвика позитивни реакции кај публиката.
Од номинираните студенти, директорот на Академијата, Саша Драгиќ, втор пат ја спаси Ана Бебиќ, додека кандидатите се одлучија да ја вратат во игра Сона Бакиќ.
До одржувањето на следната гала-вечер начин за спас ќе треба да бараат Вукашин Браиќ и Никола Сариќ. |
