Концерт на етносоставот „Езерки“ и оркестарот „7/8“

Вокалниот етносостав „Езерки“ и оркестарот „7/8“ утре во 20,30 часот ќе настапат пред домот на Мајка Тереза. По успешната турнеја низ бившите ЈУ-простори „Езерки“ и „7/8“ повторно доаѓаат во Македонија.

Двата состава работат под закрила на Хрватско-македонското друштво во Хрватска, а од 1995 година преку своите карактеристични изведби и неколку издадени албуми ја претставуваат Македонија низ цел свет. Нивните изведби претставуваат сплет на уникатни македонски ора и песни изведени на традиционален начин, но во модерен аранжман.

Ансамблот „Езерки“ има 17 члена, пет од Македонија, а другите се од Хрватска. Од 2000 година соработуваат со оркестарот „7/8“, составен од девет хрватски музичари кои свират на 12 традиционални македонски инструменти, меѓу кои кавал, тапан, тарабука, дајре. Во Хрватска ги препознаваат како балкански „Буена виста сошал клуб“. Досега имале повеќе од 80 настапи.