ДИК ќе решава и по приговори на избирачи
Државната изборна комисија првпат на овие претседателски и локални избори ќе решава по приговори на избирачи. Постапката за заштита на избирачкото право ќе се третира како итна. Тоа значи дека за приговорот што се поднесува во рок од 24 часа во писмена форма или на посебен образец, а не и по пошта, ДИК решава за четири часа. Ова значи дека за позитивно решение, ако има доволно време, односно ако изборите се во тек, гласачите можат да се вратат на избирачкото место и да гласаат.
Во приговорот незадоволните гласачи треба да ги наведат местото и времето на настанот, да ја опишат повредата и да посочат на сторителот.
Според упатството што го подготви ДИК и го објави на Интернет-страницата www.dik.mk, се вели дека при приемот на приговорот се запишуваат датумот и часот, а оттогаш почнува да тече рокот за одлучување.
ДИК ќе го разгледа приговорот и ќе одлучи дали го усвојува или го одбива како неоснован. Доколку се усвои врз основа на наведените докази, тогаш ќе се донесе решение „со кое се утврдува дека на избирачот му е повредено избирачкото право на начин што му е оневозможено да го оствари тоа“.
Избирачите кои ќе имаат докази дека одборот ги спречил во остварувањето на правото, ќе можат да гласаат. ДИК ќе го задолжи избирачкиот одбор да му овозможи на гласачот да го оствари правото доколку изборниот процес е во тек. (К.Ч.)
|
