Претходен број

ВМРО го обвини Јакимовски дека инкасирал 350.000 евра

Деспина Трајковска

Стевчe Јакимовски, градоначалнички кандидат на ЛДП, СДСМ и НСДП за скопски Карпош, ја злоупотребил функцијата министер за труд и социјална политика и инкасирал 350.000 евра на сопствена сметка, склучувајќи договор за грижа на бездомни лица со една невладина организација, чиј основач е токму тој, обвинија вчера од ВМРО-ДПМНЕ.

„Откопуваат стари конструкции и шират невистини, бидејќи се во очај и во паника. Последната анкета говори дека јас како кандидат на опозицијата водам 38 спрема 20, или речиси двојно“, експресно реагираше Јакимовски и напомена дека да имало и ронка вистина во наводите, тој нема да се кандидирал за градоначалник, оти сигурно ќе бил „една од ѕвездите во реалните шоуа со апсења на Груевски и Јанкуловска“.

Од ВМРО-ДПМНЕ напоменаа дека пред една недела бил раскинат договорот за сместување и грижа за бездомниците, склучен во 2005 година помеѓу Министерството за труд и социјална политика и „Истражувачка станица – Катланово“ на Јакимовски. Без никакви критериуми, тој склучил договор со кој Министерството се обврзало секој ден да исплатува 400 денари по човек за услуги на 50 бездомници.

„Според договорот, Министерството секој месец исплаќало по околу 10.000 евра на ‘Истражувачка станица – Катланово‘, поточно Јакимовски, како министер и потписник на фактурите за исплата, секој месец си префрлал пари на невладината организација, чиј основач е лично тој. Според процените, за три години оваа невладина организација инкасирала околу 350.000 евра“, рече портпаролот на ВМРО-ДПМНЕ Александар Бичиклиски, кој побара Јакимовски јавно да одговори дали е точно дека парите од Министерството биле префрлани на неговата домашна адреса, дали таа се' уште е наведена како седиште на организацијата и дали тој е нејзин актуелен основач.

Јакимовски потврди дека е еден од основачите на невладината организација, формирана во декември 1999 година, но објасни дека договорот не го потпишал тој, а дека бездомниците биле сместени во Катланово со владина одлука од 2005 година. Потенцирајќи дека во случајот не гледа конфликт на интереси, тој на ВМРО-ДПМНЕ му даде еден предлог за партиско-полициски истражувања.

„Ги молиме да истражат и да проверат дали е вистина дека нивниот кандидат Саша Димиќ на улица ‘Даскал Камчев‘ број 3 гради станбена зграда, затскривајќи се под туѓо име? Кога ќе го истражат и расчистат овој случај, тогаш можат да зборуваат и да прашуваат со каков било легитимитет“, дополни опозицискиот кандидат за градоначалник на Општина Карпош.

Владејачката ВМРО-ДПМНЕ ги повика надлежните институции да го испитаат наводниот скандал.