Претходен број

СОНК ќе бара разрешување на 15 директори на училишта

Синдикатот ќе побара и отштета за оние наставници кои претрпеле психички нарушувања

Жаклина Хаџи-Зафирова

СОНК ќе бара од градоначалниците да разрешат 15 скопски директори на основни, средни и едно специјално училиште, а ќе побараат смена и на еден просветен општински инспектор од Гази Баба. Ова се првичните потези кои СОНК ќе ги преземе против првите луѓе на училиштата за кои оцениле дека за време на штрајкот на просветарите постапиле спротивно на Уставот и законите. СОНК најави и кривични пријави не само против директорите туку и против градоначалниците кои вршеле притисоци да се прекине штрајкот. Паралелно со ова, СОНК ќе побара и отштета за оние наставници кои поради притисоците имале психички нарушувања. И во Министерството најавуваат поднесување кривични пријави, но се' уште ги разгледуваат случаите за кои сметаат дека биле незаконски. Велат дека добиле куп пријави.

СОНК ќе бара разрешување на четворица директори на основни училишта во Општина Кисела Вода, како и во две основни училишта во Гази Баба, каде што ќе се бара одговорност од еден просветен инспектор. Од градоначалникот на Општина Карпош ќе се бара да ги разреши директорите на едно средно и едно основно училиште, како и во Бутел, каде што се бара разрешување на директорите на едно основно и едно специјално основно училиште за децата со посебни потреби. Директорски смени се бараат и во четири основни училишта во Општина Центар, каде што се регистрирани притисоци.

„Од градоначалниците бараме тие директори да бидат разрешени и даваме образложенија што направиле. Ова е прва фаза каде што бараме смена на директори со цел тие што го кршеле Уставот да немаат моќ повторно да го кршат. Дополнително ќе ја разгледуваме можноста за кривични пријави“, најави вчера претседателот на СОНК, Дојчин Цветановски.

Во Синдикатот наголемо се разгледуваат случаите каде што се евидентирани притисоци за време на штрајкот и разни незаконитости, а досега тие ги разгледувале случаите само за Скопје. Цветановски најави и дека оние членови на СОНК кои не ја почитувале одлуката за штрајк ќе бидат исклучени од Синдикатот.

„Ќе чекаме градоначалниците да постапат по нашите барања за разрешување и потоа ќе излеземе со конкретни податоци каде е постапено, а каде не и во кои училишта се регистрирани незаконитостите и притисоците“ објаснува синдикалниот лидер.

Државниот просветен инспекторат во Министерството за образование работи на записниците кои ги добиле од просветните инспектори, а дури потоа ќе одлучат за кои случаи ќе поднесат пријави.

„Има куп записници, но се' уште не се знае колку пријави ќе бидат поднесени“, ни изјави вчера директорот на Инспекторатот, Роберт Ѓоргиев.