Поддршка за евроатлантските аспирации на Македонија од британскиот парламент
Претседателот на Собранието, Трајко Велјаноски, се наоѓа во четиридневна посета на Велика Британија
Од нашиот дописник
Томислав Ивановски
ЛОНДОН - Претседателот на Собранието на Република Македонија, Трајко Велјаноски, кој се наоѓа во четиридневна посета на Велика Британија, се сретна и разговараше вчера во Лондон со својот домаќин - спикерот на британскиот парламент, Мајкл Мартин.
Во разговорот што помина во мошне срдечна и пријателска атмосфера, од британска страна уште еднаш е изразена силна поддршка на евроатлантските аспирации на Македонија во настојувањето да се надминат препреките што се испречија на тој пат. Британија беше и остана застапник на процесот за проширување на НАТО и на Европската унија со земјите од Западен Балкан и во таа нејзина определба официјален Лондон секогаш се залага за приклучувањето на Македонија кон овие две организации. Спикерот Мартин одново изрази надеж дека „препреките што сега се испречија ќе се решат со текот на времето“, давајќи поддршка на напорите што се прават за надминување на „проблемите што постојат“.
Велјаноски и Мартин разменија мислење за работењето на двата парламента. Мартин детално ја елаборираше работата на британскиот парламент, а стана збор за тоа што е она што може да се искористи како искуство од Вестминстер и да се примени во македонски услови. Британскиот спикер објасни дека кога станува збор за закони и прописи што ги подготвува владата, практика во Британија е прво да одат во парламентот, а потоа за нив се известуваат медиумите и преку нив пошироката јавност. Велјаноски притоа навести дека тоа е корисно сознание што може да се пренесе и во Македонија и во работењето на нашето Собрание.
Пред средбата со Мартин, претседателот на Собранието имаше работен состанок со Даниел Фирн од британскиот Форин офис, а по едночасовниот разговор со парламентарниот спикер, целата македонска парламентарна делегација беше примена и разговараше со раководителот на парламентарната група за Македонија при Вестминстер, во која членуваат пратеници од сите британски партии во Долниот дом. На оваа средба стана збор и за реализацијата на акциониот план, направен на конференцијата во Вилтон Парк, при што беше речено дека тој е целосно исполнет и останува уште донесувањето на законот за парламентот што, како што беше најавено во самите разговори, ќе биде направено до април следната година.
Во овие разговори, покрај македонскиот спикер, учествуваа и другите членови на нашата парламентарна делегација, координаторите на пратеничките групи Силвана Бонева од ВМРО-ДПМНЕ, Цветанка Иванова од СДСМ, Тахир Хани од ДУИ, Имер Алиу од ДПА и Роза Топузова-Каревска од ЛДП. |
