Ограбена пошта во Битола

БИТОЛА - Вооружен грабеж среде бел ден во битолската пошта на Ат-пазар, едно од најфреквентните места во градот. Маскирани разбојници, заканувајќи се со пиштол, ја испразниле касата на поштата и побегнале. Според полицијата, разбојниците маскирани со безбол капи со големи стреи и со темни очила впериле пиштол во службеничката. Но, додека се заканувале, случаен минувач ѕирнал во излогот на поштата. Ограбувачите се вознемириле и веднаш ја грабнале торбата со пари. Бегајќи, половина од парите им паднале на улицата. Тие однеле само 6.700 денари. Полицијата набрзо пристигнала на местото, но едно од полициските возила во мешаницата се судрило со трактор. (А.Б.)