Бранко Героски поднесе пријава поради заканите

Точно напладне уредникот на неделникот „Сега“, Бранко Героски, вчера се упати кон скопското Основно јавно обвинителство каде што поднесе поднесе кривична пријава против непознат сторител. Кривичната пријава е поради загрозување на сигурноста откако новинарот добил заканувачки СМС-пораки за него и за неговото семејство.

Героски вчера информираше дека по шест дека откако му биле упатени заканите, бил повикан во полиција. Таму бил информиран дека пораките биле испраќани од телефонски броеви на операторот ВИП, а картичките биле купени од непознати лица во Штип. Героски јавно ја повика министерката Гордана Јанкулоска да го расветли случајот, а од ВИП побара поголеми проверки при продажба на телефонски картички.

Пораките стигнале на телефонски број што го користел Геровски додека работел во „Дневник“, а тој број сега и' припаѓа на една новинарка во Редакцијата.

Според Героски, тоа дека пораките не и' се упатени на новинарката лесно може да се заклучи. Обраќањето е во машки род и заканите се упатени кон деца, а не кон едно дете колку што има новинарката. Првата порака анонимниот испраќач ја испратил од бројот 077-511-950 и во неа стоело „Ќе плачеш за децата!“, а во втората било напишано „Продаден дебилу. Ќе бидеш осуден за клевета, како почеток!“.

За случајот, МВР испрати соопштение до јавноста во кое информира за информативниот разговор со Героски. (Љ.С.)