Иванов ќе го проверува Црвенковски

По објавувањето на клипот на „Јутјуб“, според кој поранешниот шеф на државата, Бранко Црвенковски, наводно, потрошил 500 илјади евра за пи-ар, од кабинетот на претседателот Ѓорѓе Иванов соопштија дека ќе ги испитаат сите законски можности документите поврзани со овој случај да и' бидат достапни на јавноста, согласно со Законот за пристап до информации од јавен карактер. „Она што можеме да го соопштиме моментно е дека во архивата на Кабинетот на претседателот на Македонија постои документација што се споменува во извештаите на медиумите и дека во нивната изработка учествувале повеќе стручни консултанти од Словенија“, соопштија од претседателскиот Кабинет.

Од кабинетот на Црвенковски, пак, одговорија дека тие веќе го кажале тоа што го потврдува со соопштение Кабинетот на претседателот Иванов. „Ова е само еден од многуте документи што ги имаат експертите од Словенија подготвено и тоа постои во архивите во Кабинетот на македонскиот претседател. Зошто Кабинетот на претседателот Иван��в не ја демантира сумата што е наведена во медиумите, со оглед на фактот што точната сума и точната документација за исплата ја има во Кабинетот на македонскиот претседател“, посочија од Кабинетот на Црвенковски.