Павер-елементи и нови канделабри во населбата Скопје Север

Општината ја разгледува можноста за отворање зелен пазар во населбата

Општина Бутел гради пешачко плато покрај средното економско училиште „Арсениј Јовков“ со површина од 1.000 квадратни метри. Со изградбата на платото на улицата „Костурска“, ќе се уреди влезот пред ова училиште, кој беше обраснат со троскот. Ќе се исчистат и сите остатоци од некогашните бараки, а ќе се отстранат и старите возила. На ова место ќе се изгради и нов паркинг-простор, на кој се поставува и нова електрична инсталација за шесте канделабри што ќе го осветлуваат.

Од Општината објаснуваат дека ја разгледуваат и можноста за отворање зелен пазар во близина на улицата „Костурска“. Сметаат дека токму оваа локација е најпогодна поради тоа што овој дел од населбата е густо населен и фреквентен поради неколкуте јавни установи во близина. Жителите од Скопје Север сега мораат да пазаруваат на зелените пазари во Чаир и Бутел и на дивиот пазар во населбата Топанско Поле.

Уредувањето на целиот потег се заокружува со поставување павер-елементи на патеките што водат од улицата „Костурска“ до влезовите на станбените згради. Тие ќе бидат осветлени со нови канделабри, а ново осветлување ќе има и секаде каде што е потребно на другите улици. Нови 15 канделабри веќе има на улиците „Лазо Москов“ и „Тале Христов“.

Средствата за сите зафати се обезбедени од буџетот на Општина Бутел. (Сн.К.)