Македонија со најголема невработеност во регионот

Македонија, по Косово, има највисока стапка на невработеност во Европа, а со 33 проценти невработени државата е апсолутен лидер меѓу останатите балкански земји. Анализата на хрватското списание „Банка“ покажува дека по Македонија следуваат БиХ со 23,4 отсто невработени, Хрватска со 15 и Црна Гора со 14,7 проценти невработени.

Платите на Македонците се меѓу најниските во регионот, помала просечна плата има само Србија со 320 евра, потоа следува Македонија со 330, Босна со 390, Црна Гора 450, а во подобра позиција се само Хрватска со 720 и Словенија со 930 евра просечна плата. Македонските граѓани, меѓутоа, мислат дека состојбата е уште полоша и не веруваат дека просекот на плата од 21 илјада денари го претставува реалното месечно примање во земјата.

Висока стапка на невработеност е феномен што во Македонија постои дваесетина години. Од Македонија поголема невработеност имаат само земји и територии од третиот свет или оние што се разурнати од воени дејства.

Земји со најмногу невработени жители се Зимбабве, Либерија, Туркменистан, слична состојба со Македонија на пазарот на вработување има во Камерун, Екваторијална Гвинеја, Мали, а во подобра ситуација се земји како Албанија, Грузија, Либан или Молдавија.

Просечната стапка на невработеност во Европската унија е околу 10 проценти. (Ек.Р.)