Повторно штрајкуваат вработените во „Бритиш ервејз“

Лондон - Персоналот вработен во кабините на авионите на „Бритиш ервејз“ вчера го почна првиот од трите штрајка од по пет дена што треба да се одржат до крајот на мај и на почетокот од јуни, продолжувајќи го 15-месечниот спор што трае меѓу управата на најголемата британска авионска компанија, дел од вработените и синдикатот „Унита“.

Претходниот штрајк, што требаше да почне на 18 мај, беше забранет од судот во Лондон, кој откри неправилности при гласањето за донесување одлука за штрајкување. Во текот на викендот беше направен обид за обновување на преговорите меѓу менаџментот на компанијата и на синдикатите, но преговорите пропаднаа откако поголема група вработени, прикажувајќи се како припадници на крајно левичарската социјалистичко-работничка партија, упаднаа во зградата каде што се водеа преговорите и ги прекинаа разговорите.

Лидерите на синдикатите се обидоа во последен момент да обезбедат концесија за штрајкувачите, предлагајќи штрајковите да се откажат ако компанијата се согласи да им го врати правото на бесплатно патување на персоналот што штрајкуваше во март, кое компанијата им го укина.

Авионската компанија не ја прифати понудата, инсистирајќи тоа да биде дел од вкупниот договор што двете страни не успеваат да го постигнат околу условите за работа и платите.

„Бритиш ервејз“ соопшти дека компанијата е подготвена да одржува 60 отсто од летовите на долгите дестинации и 50 отсто од оние на покусите дестинации со оние што не се согласуваат со штрајковите и доаѓаат на работа.

Намалување на летовите и проблеми во одржувањето на редот на летањето има само на аеродромот „Хитроу“ во Лондон, што претставува база за авионите на „Бритиш ервејз“, додека летовите од „Гетвик“ и од аеродромот „Сити“ се одвиваат нормално.

Британската телевизија Скај тврди дека одѕивот штрајкувачите е помал од во мартовскиот и оти има доволно екипаж, за да не дојде до приземјување на целата компанија. Следниот штрајк треба да се одржи на 30 мај, а последниот од оваа серија штрајкови на 5 јуни.

Авионската компанија соопшти дека минатата година ја завршила со загуба од над 500 милиони фунти, како последица на влошените услови за работа, но и на штрајковите со кои се соочува една и пол година. (МИА)