Колку Македонците ги применуваат светските банкарски практики

Банките сакаат да ги преориентираат граѓаните кон електронско банкарство

Соња Маџовска

Честите поплаки на граѓаните во однос на чекањето пред банкарските шалтери и неуслужноста на банкарските работници, банките го оправдуваат со тоа што тие им се достапни на клиентите не само преку филијалите, туку 24 часа преку Интернетот, телефонот и банкоматите. Стопанска банка реши да работи во дел од своите филијали по нов организациски модел, односно преку недела од 8, 45 до 16, 45 часот, а за викендите да работат помал број филијали низ земјава. „Новото работно време беше воведено првично во јануари кај пилот-филијалите во Скопје и тоа се покажа успешно, па затоа етапно се воведува и во останатите филијали. Секако, планирани се повеќе работни места во филијалите што сега работат во сабота, со цел повеќе и побрзо да се опслужат клиентите што ги бараат нашите услуги“, вели Константина Панагиотопулу, втора генерална директорка на Стопанска банка, одговорна за секторот за управување со мрежа на филијали и секторот за управување со производи. Таа објаснува дека новиот модел на функционирање е развиен во САД и во Англија за потребите на групацијата на НБГ, а во регионот веќе е имплементиран во Романија, Србија, Бугарија и во Грција. „Стопанска банка како модерна банка нуди 24-часовна услуга. Физичкиот пристап, за клиентот, е само една контакт-точка со банката, а во останатите се вбројуваат Интернетот, телефонот, банкоматот, но и трајната и постојаната врска со вработените што се задолжени за водење на клиентите. Кон овој модел на работа Стопанска банка се стремеше во изминатите пет години и во моментов влегуваме во завршна фаза и голем дел од нашите услуги се достапни 24 часа. За да стигнеме до овој момент инвестиравме многу знаење, труд, трпение и посветеност и, секако, беа направени големи инвестиции во подобрувањето и во унапредувањето на ИТ-системот. Со тоа остануваме пионери во воведувањето нови и иновативни производи и услуги, кои ја намалуваат потребата клиентите да го трошат своето драгоцено време во филијалите на банката“, вели Панагиотопулу. Таа додава дека врз основа на анализите на пазарот оваа банка ја оптимизира мрежата на филијали, а оваа година ќе го удвои и бројот на банкомати. „Банката води детаљна евиденција и анализа на податоците за бројот на трансакциите што ги извршуваат филијалите, фреквенцијата на клиентите, периодичното зголемување или намалување на посетеноста и соодветно го приспособува бројот на активни работни места. Новиот модел е приспособен од светската банкарска практика за македонски услови и тој првпат воведува работни места по сегменти на клиенти. Имено, од неодамна нашите филијали се опремени со вработени што се целосно посветени на работа со мали и микрокомпании, работа со големи клиенти, советници за депозити и кредити, односно управување со лични финансии“, објаснува Панагиотопулу.

Според неа, се' повеќе клиенти се ориентираат кон електронското банкарство, како побрз и поефикасен метод. „Стопанска банка направи истражување кај корисниците на сопствениот е-банкинг систем и доби позитивни коментари. Секако, ги користиме сите забелешки и препораки со цел што побргу да го подобриме сервисот, кој не само што е брз и ефикасен туку е економичен и едноставен за употреба. Со интензивните презентации на услугата во филијалите на банката и обезбедувањето позиција за компјутер за клиентите во филијалите, користењето алтернативни канали наскоро ќе се зголеми“, вели Панагиотопулу. Поаѓајќи од своето долгогодишно искуство во банкарскиот сектор во регионот, таа уверува дека иако клиентите не веднаш ги прифаќаат новитетите, штом ќе ги разберат предностите и начинот на употреба не се двоумат да ги применуваат и со тоа да го зачуваат своето драгоцено време.