Излевањето не е од Мавровско Езеро

„Испуштањето на водите од  Мавровско Езеро не е причинител за излевањето на Вардар во делови од општината Јегуновце. Вкупниот истек на вода од езерото, доколку хидроелектраните ‘Вруток‘ и ‘Равен‘ би работеле во максимален режим, учествува со 20-30 проценти од протокот на реката“, ова го потенцира вчера во соопштение АД „Електрани на Македонија“. Притоа, појаснува дека во континуитет го редуцира режимот на истекот на водите од Мавровско Езеро, преку намалување на производството на електрична енергија, во согласност со состојбата на порастот на нивото на акумулацијата. 

Со ова може да се влијае на намалување на водостојот на Вардар пред Тетово. „Коритото го полнат Пена, Боговињска Река, Бистрица, Поројска Река... што придонесува за зголемен водостој на кој истекот од Мавровско Езеро има речиси минимално влијание“, нагласуваат од ЕЛЕМ. Со работата на хидроелектраната „Вруток“, се контролира порастот на акумулацијата Маврово. „Дотокот на вода од шарскиот довод изнесува 16 кубни метри во секунда, а од јеловскиот уште пет метри во секунда, или вкупно 21 кубен метар во секунда. Тие количини вода, доколку не работи хидроелектраната ’Вруток‘, би прелевале преку водостојот во Вруток и повторно би завршиле во Вардар“, се вели во соопштението на ЕЛЕМ. (Д.Р.)