Привршува зградата, се подготвува подземната улица

Инвеститорот ќе почне да ја гради подземната улица по Нова година, што ќе биде единствената сообраќајна врска со објектот

Деспина Трајковска


Инвеститорите на објектот, кој се гради на местото на некогашна Народна банка, се подготвуваат веднаш по Нова година да започнат со изградба на подземната улица што ќе биде единствена сообраќајна врска со деловната зграда. Од „Дивелоп груп“, кој заедно со „Латис“ инвестираат во зградата вредна 10 милиони евра, очекуваат наскоро да ја добијат комплетната документација за да започнат со градежните активности на терен. Истовремено очекуваат да им биде готов и проектот за фасадата на деловната зграда. Според Александар Ивановски, управител на „Дивелоп“, динамиката на изградбата на улицата ќе се одвива забрзано како таа би била готова до 15 март, кога се отвора летната сезона на кејот.

„Ваквите планови се првенствено од наша корист, бидејќи улицата ќе биде единствената сообраќајна врска со објектот чија изградба речиси е во завршна фаза. Иако планиравме да ја започнеме изградбата уште летово, таа не стартуваше од објективни причини. Апсолутно е неточно дека сме се откажале од изградбата, како што се шпекулира во јавноста, туку чекавме да заврши сезоната на летните тераси, а се подготвуваше и документацијата. Нема логика да инвестираме 10 милиони евра во деловната зграда, а притоа да не ја изградиме и улицата, која ќе не чини 10 пати помалку“ вели Ивановски. Подземната улица ќе понира од влезот на паркингот кај „Холидеј ин“, ќе биде шест метри под земја со ширина од 5,5 метри и висина од 3 метри. Таа, практично, ќе се наоѓа под пешачката зона на кејот.

Дури да ги започнат градежните работи за улицата потребна за сообраќајна комуникација со деловниот објект, на него привршува изградбата на последниот, шести кат. Инвеститорите очекуваат наскоро да го добијат и нарачаниот проект за фасадата. Оптимисти се дека комплетно и улицата и зградата ќе бидат готови до пролет. Шесткатницата, која ќе има фасада слична на некогашната Народна банка, ќе ја користат исклучиво деловни субјекти. Од „Дивелоп“ веќе се во преговори со две компании на кои би го издале просторот на користење.