Сплавови на Вардар како на Дунав

За нова плажа и сплавови се планирани 150.000 евра

Нова градска плажа и четири сплава в година ќе го окупираат Вардар од двете страни по текот. Град Скопје веќе подготвува терен за реализација на проектите. Бара фирма што ќе ја изгради потребната инфраструктура, конкретно се бара изведувач на фекалната и водоводната мрежа за потребата на сплавовите и плажата. Според важечкиот урбанистички план, сплавови ќе има на двата брега, на десниот тие се предвидени спроти новиот објект на МНР и музејот на ВМРО, а, пак, на левиот пред колонадата и музејот каде што ќе се наоѓа и втората градска плажа.

Токму овие проекти се едни од капиталните за реализација на Градот во 2011 година и во буџетот за таа намена е планирано да се потрошат 150.000 евра. Од Град Скопје вчера потврдија дека станува збор за капитални проекти, но штуро информираа за динамиката на реализација воопшто за деталите.

„Сплавовите ќе се наоѓаат на локациите предвидени со предметниот урбанистички план, а градската плажа пред музејот. Плажата ќе функционира по истата шема како и постојната, а, пак, за сплавовите сите детали ќе се утврдат со проектите што се во фаза на изработка“ одговорија вчера од Градот.

Единствено е сигурно дека новите содржини околу Вардар сигурно ќе почнат да се градат до пролет, па токму од тие причини надлежните отсега бараат фирми изведувачи. (Дс.Т.)