Сакаат да плаќаат на шалтер, а не преку Интернет

Банките велат дека се создаваат редици само во одредени денови кога се исплаќаат пензии

Соња Маџовска

За поплаките на граѓаните за чекањето во банките и услужноста на банкарските работници, од банките велат дека оценката е генерализирана �� дека се создаваат редици само во одредени денови кога се исплаќаат пензии и кога стасуваат сметките за наплата. Од Комерцијална банка сметаат дека мрежата од филијали, експозитури, банкомати и шалтери, со кои располага оваа банка, е оптимално развиена во согласност со потребите на граѓаните и со доволен број вработени, според просечниот обем на трансакции што се реализираат во секоја одделна експозитура.

Сепак, од оваа банка велат дека тешко се менува македонскиот менталитет и граѓаните повеќе сакаат да одат на шалтер да завршат работа, наместо да го користат Интернетот. „Оцената дека македонското банкарство се карактеризира со долги редици пред шалтерите ја сметаме за генерализирана, бидејќи ваква состојба може да се забележи само во одредени периоди во месецот, во првата недела меѓу 4. и 7. во месецот кога се врши исплата на пензии и вториот период, од 15. до 20. во месецот кога достасува рокот за плаќање на сметките за јавни услуги, кои треба да се платат најдоцна до 20. во тековниот месец. Тоа се должи на одлуката на Владата за исплата на трите групи пензионери преку транскациски сметки во првата недела од месецот. Само во Комерцијална банка во наведениот период се опслужуваат над 65.000 пензионери. И покрај големиот развој на алтернативни канали, пред се', картичното работење, трајни налози за плаќање сметки за јавни услуги, електронско банкарство, дел од клиентите согласно со своите навики, го користат шалтерот како единствен начин на комуникација со банката“, вели Маја Стевкова-Штериева, главен финансиски директор во Комерцијална банка.

Според неа, банкарскиот сектор прави многу за решавањето на овој проблем. Сепак, останува фактот дека се' уште треба да се работи на подигнување на свеста на населението и уверува дека алтернативните канали, односно е-банкарството граѓаните треба да го користат без никакви предрасуди, бидејќи е максимално безбеден, без никаков ризик. „Комерцијална банка им понуди можност на своите клиенти, физички и правни лица преку користење на Интернет-банката, без да одат на шалтерите, да плаќаат сметки, да пренесуваат средства од една на друга сметка, да ја проверат состојбата и прометот на своите сметки, 24 часа на ден од кое било место во светот. Услугите за правни и физички лица преку Интернет-банката се со пониски цени од услугите што ги добиваат на шалтер, а воедно брзи и ефикасни и едноставни за користење. Плаќањата што ги прават физичките лица во интерниот систем на банката и за плаќање сметки за јавни услуги се бесплатни. Трендот покажува континуирано зголемување на бројот на корисници на електронското банкарство, како и број на електронски реализирани налози“, смета Штериева. Таа вели дека посветуваат големо внимание и на подобрување на услугите од страна на банкарските работници, а преку нивни континуирани обуки сакаат да ја подобрат комуникацијата со клиентите и ефикасноста при давање на услугите. „Дополнително, банката има уште еден канал за дистрибуција на информации, СМС-банкарство. Преку овој канал клиентите можат да добиваат информации за секоја направена трансакција со картичка, потсетување за изминување на рокот на важност на картичката, како и информации за нови производи“, објаснува Штериева.