Грција не се откажува од еврото, Папандреу повика на трпение

Лондон - Гувернерот на Грчката централна банка и член на Управниот совет на Советот на Европската централна банка, Јоргос Првопулос, порача дека Грција нема да ја напушти еврозоната наспроти големата финансиска криза во која се нашла, објави британскиот весник „Фајненшел тајмс“. Првопулос го наведува ова во авторскиот напис за ФТ по повод шпекулациите дека грчката влада, притисната од должничката криза, ќе мора да се откаже од еврото и повторно да воведе своја национална валута, со цел нејзината девалвација домашната економија да ја направи поконкурентна.

Тој не спори дека грчката конкурентност опаднала, но наведува дека тоа се случило затоа што Владата многу време потрошила кога економијата растела и кога требало да го елиминира јавниот долг. Големите проблеми во грчката економија настанале, според него, делумно и поради структурната неусогласеност, како што е недостигот од флексибилност на пазарот на труд.

Грчкиот премиер Јоргос Папандреу вчера ги повика фармерите да ги прекинат блокадите на патиштата и на граничните премини, бидејќи земјата моментно се бори со најтешка финансиска криза досега.

Илјадници фармери го почнале протестот со барање за зголемување на државните субвенции за земјоделството и за повисоки откупни цени на земјоделските производи. Во изминатите пет дена тие ги блокираа главните патишта и граничните премини кон соседните држави и поради тоа се изложени на притисоци од владата, која се обидува да го намали зголемениот буџетски дефицит. „Ги замолувам фармерите да бидат одговорни. Сите не' гледаат, довербата во нашата земја секој ден зависи од тоа што го кажуваме и правиме“, рече Папандреу во парламентот. (МИА)