Претходен број

ИНТЕРВЈУ

Шекеринска е најголемото разочарување на СДСМ

Никола Поповски, поранешeн висок функционер на СДСМ

Соња Крамарска

Господине Поповски, Ве снема од политиката? Каде сте сега, се „пензиониравте“ ли од политика?

По релативно долг период во политичкиот живот од 20 години, сега сум во позиција малку да се одмoрам. Од септември ќе најдам некој ангажман, но нема да биде политички.



Имате ли контакти со СДСМ?

Малку. Од партијата не ми се имаат јавено од моментот на распуштање на парламентот.



Тоа значи дека не се консултираа со Вас и не Ви кажаа дека нема да бидете на листата на кандидати за пратеници?

Не, откако е распуштен парламентот актуелното раководство целосно се откажа од потребата да ме вклучи во што било. Така што првпат по 18 години изборната кампања ја поминав дома гледајќи телевизија. Но, не по своја желба.



Очекувавте ли да се најдете и овој пат на пратеничката листа?

Единствено што не очекував е дека никој нема да ме праша за ништо.



Ви паѓа ли тешко што по две децении ангажман во политиката се најдовте настрана, како што велите, не по своја желба?

Искрено да ви кажам, имајќи го предвид начинот на кој се раководи со партијата, кои политики ги заговара, многу малку ми е тешко околу тоа. СДСМ во овој момент е во целосен организациски, кадровски и идеен нокдаун.



Зошто му се случува тоа на СДСМ?

Првиот голем проблем се јави уште во 2004 со изборот на тогашното ново раководство. Тогаш СДСМ почна да оди надолу во идејна и во политичка смисла. Беа направени промени внатре кои, според мене, беа прилично негативни. Обидот да се консолидира партијата со сегашното раководство по изборите во 2006 се покажа дека е целосно неуспешен. Гледано од мој агол, со доаѓањето на Бучковски на чело на СДСМ (тогаш јас бев отворен противник на таквата кадровска комбинација) за мене беше очекувано она што се случи потоа со партијата. Со новото раководство на Радмила Шекеринска моето разочарување беше уште поголемо. Радмила е најголемото ра��очарување на СДСМ. Не покажа ништо.



На што мислите поточно?

Случувањата во СДСМ беа олицетворение на тие што ја водат: Радмила Шекеринска, Игор Ивановски, Јани Макрадули, Горан Минчев. Тие ја водеа партијата на еден крајно несериозен начин, мислејќи дека состојбите ќе се

Радикално решение за СДСМ Каква разврска предвидувате со оглед на тоа дека Црвенковски рече дека нема да се кандидира за уште еден претседателски мандат, што отвори шпекулации дека се враќа за лидер на партијата? На СДСМ не му треба лидер од сегашната постава која ја уништи партијата, туку е потребно некое радикално решение. Не човек кој ќе ги собира сите отцепени од СДСМ, туку точно ќе знае да одреди што е добро во СДСМ, а што е лошо и ќе го отстрани од партијата. Дали од тоа може да се заклучи дека Вие сте против Црвенковски да се врати на кормилото на СДСМ? За Црвенковски не сакам да коментирам. Тој е претседател на држава. Toj се изјасни дека нема да се кандидира за уште еден мандат. Дали и како ќе се врати во СДСМ, ќе видиме откако ќе му заврши мандатот. Реформата на СДСМ и изборот на ново раководство ќе се случат пред завршувањето на претседателскиот мандат на Црвенковски. Ако новото раководство на СДСМ го чека Црвенковски до мај, тоа ќе значи смртна пресуда на партијата. Но, јас мислам дека тие ќе дадат решение според истата досегашна логика. Радмила ќе ја замени некој што е исто толку неспособен колку и таа.

средат сами од себе. Повеќе беа преокупирани со своите дворски игри, не ја обновија партијата, разграноците ги оставија какви што беа - полураспаднати. Мислеа дека имаат уште десет години за да ја подготват партијата програмски и политички. Наместо да направат сериозни кадровски, организациски и политички резови во партиското тело, тие не направија никакви. Напротив, поразените на конгресите од 2006 и почетокот на 2007 година ги претворија во главни играчи. Радмила го дозволи тоа.



Рековте дека сте ја следеле изборната кампања од дома. Веројатно така е полесно да се видат слабостите на Вашата партија во кампањата. До какво сознание дојдовте седејќи пред телевизорот?

Тоа беше катастрофална кампања на СДСМ. На агресивната кампања на ВМРО-ДПМНЕ, СДСМ не се спротивстави со ништо. Само со едно ветување на претседателката Шекеринска дека таа лично ќе ја внела Македонија во Европа во рок од шест месеци. Мислам дека тоа беше демонстрација на една голема препотенција. Ниту еден политичар во Европа не вели јас ја внесов или ќе ја внесам мојата држава во Европа, вклучувајќи го да речеме и двоецот Кучан – Дрновшек, кои во период од десет години ја водеа Словенија. Кај нас госпоѓата Шекеринска се изјасни дека во рок од шест месеци ќе ја внесе Македонија во Европа и дека таа го добила кандидатскиот статус за ЕУ. За кандидатскиот статус десет години наназад работеа десетици илјади луѓе.



Веднаш по изборите исплива името на Зоран Заев како можен кандидат за претседател на СДСМ. Што мислите за тоа?

Тој е еден од тројцата потпретседатели за кои сметам дека сите заедно имаат способност колку што има Радмила Шекеринска за да ја водат партијата во овие тешки времиња. Таа способност е исклучително мала.



Во СДСМ се тврди дека популарноста на Заев е толку голема што ја поттикна Владата да поведе политички прогон против него. Се согласувате ли со таквите оцени?

Политиката на ВМРО-ДПМНЕ е политика на диктатура во Македонија. Ако некој очекува тоа да личи на Сталиновата диктатура или на фашистичка диктатура греши, затоа што сега се други времиња. Во вака глобализиран свет и односи меѓу државите на европско и на светско ниво не можете да очекувате сталинистичка или хитлеровска диктатура, туку прикриена и соодветна на времето во кое живееме. Полошо од ова не може да биде. Мислам дека ВМРО-ДПМНЕ врши прогон на политички неистомисленици.



Значи сметате дека и Заев жртва на таа диктатура?

Да, жртва е. Времето, терминот и начинот на кој Зоран Заев го гонат државните органи е типичен политички удар од страна на ВМРО-ДПМНЕ врз СДСМ. Тука нема никаква врска ниту Обвинителството, ниту судството, ниту полицијата.



Дали тоа значи дека ја оправдувате аболицијата што му ја даде претседателот Црвенковски?

Нема да се впуштам во коментари дали е тоа добро или лошо, но не се согласувам со сите оние што мислат дека не смее да се употребува аболиција. Јавно сакам да го потсетам ВМРО-ДПМНЕ дека во април или мај 2003 година Борис Трајковски даде аболиција за уште потешко кривично дело прислушување на илјадници луѓе. Тоа беше фашистичко прислушување.



Но, СДСМ тогаш го нападна овој потег на Трајковски со сите можни оружја...

Да, ВМРО-ДПМНЕ молчеше тогаш, а сега изјавува дека аболицијата е државен удар. Аболицијата на Трајковски врз Димовска беше типична злоупотреба на правото, бидејќи за едно сосема очигледно кривично дело кое навлезе во втората година од судската постапка изрече аболиција пред да биде изречена судската пресуда. Додека, пак, Црвенковски ја образложи аболицијата со тоа дека самата постапка е исполитизирана во Обвинителството и во судството и затоа тој употребува политичка мерка на аболиција.



Некои велат дека Заев може да се збогува со политичката кариера, особено со лидерските амбиции? Во право ли се?

И јас мислам дека политичката кариера на господинот Заев со аболицијата е завршена. Тој може да добие можеби само уште еден градоначалнички мандат.



Ве мачи ли прашањето како СДСМ, вака расцепкан, ќе помине на локалните избори?

СДСМ на локалните избори треба да се бори да освои пет-шестмина градоначалници и тоа ќе биде голем успех. Затоа што е можно да не освои ни толку.



А за претседателските избори? Ако Црвенковски навистина се повлекува, СДСМ ќе мора да даде нов кандидат за претседател?

Има во СДСМ луѓе кои можат да бидат претседателски кандидати и да бидат успешни шефови на државата. Тие се докажале во својата демократска и европска ориентација. Меѓутоа, тие не се омилени кај раководството на СДСМ. Во СДСМ, ако сте на над 45-годишна возраст, веќе не сте за употреба.



Кога Вие би имале шанса да го консолидирате СДСМ, кои би биле трите први чекори што би ги направиле?

Не ни помислувам на тоа јас да бидам тој што ќе ја консолидира партијата. Јас сум човек кој сака да размислува на долг рок. Во СДСМ се урнати многу мостови и јас лично навистина не знам кој ќе се најде храбар да ја преземе целата одговорност, да има лош изборен резултат и да си замине. Треба да се појави човек што ќе ја среди партијата организациски, политички и кадровски. Тоа ќе го чини губење на наредните избори, затоа што ќе мора да направи многу резови, меѓутоа СДСМ ќе биде подготвен од наредните избори натаму да се врати на голема врата. Во СДСМ моментно нема такви. Сите актуелни кандидати што се вртат во медиумите се инстант-политичари.



Што мислите за бојкотот на парламентот од страна на СДСМ?

Тоа беше апсолутна грешка за која некој мора да понесе сериозна одговорност. Дозволија низ парламентот во рок од еден месец власта да ги донесе сите закони како што си сака. Опозицијата буквално ја ставија на маргините на политичкиот живот со некои од правилата што ги донесоа. И сега се врати СДСМ во парламентот, каде што може да отседи четири години без право на глас.



Ќе прифатите ли покана од Црвенковски, доколку се врати во СДСМ, да бидете заедно дел од новото раководство?

Јас и Црвенковски сме работеле на многу проекти заедно наназад 20 години. Ако Црвенковски сака да се врати во СДСМ и ако сака да биде повторно претседател, треба да си ја помине внатрепартиската процедура како и секој друг кандидат за лидер. Не мислам дека сегашното раководство кое е раководено од двоецот Бучковски - Шекеринска ќе го дозволи тоа. Мислам дека Црвенковски ќе наиде на жесток отпор од овие две структури, со цел тие да ги задржат своите позиции. Крилото на Бучковски во овој момент контролира 40 отсто од Извршниот одбор, 50 отсто од пратеничката група, повеќе од половината претседатели на разграноците. Шекеринска го знае тоа, го премолчи и го прифати како факт со кој треба да живее. Таа успеа да ги „окупира“ преостанатите 50 или 60 проценти и сега тие двајцата се најдоа во еден совршен брак. И едниот и другиот сакаат Заев да биде новиот претседател. Бучковски затоа што Заев работеше за него до 2006 година, потоа Заев се сврте кон Шекеринска и таа, исто така, си го смета за свој новостекнат пријател. И двајцата се надеваат дека еден таков претседател нема да се оттргне од нивното влијание. Затоа велам дека ако Црвенковски сака повторно да се врати на кормилото на СДСМ, тоа нема да се случи толку лесно како што тој замислил.