Претходен број

Поглед

Агонијата на МРТ

Мирче Јовановски

Агонијата на Македонската радио-телевизија продолжува. И покрај законските измени кои беа донесени на препад, без присуство на опозицијата, и со кои се овозможува стечај на националниот јавен сервис, работите тешко се мрднуваат од мртва точка. Тоа, во превод значи дека долгогодишната состојба на клиничка смрт во која практично се наоѓа МРТ трае и засега е без изгледи оваа куќа да застане на здрави нозе. Дури може лесно да се случи, додека се најде решение, пациентот да умре.

Голема непознатост е дали предложената можност за стечај на МРТ е „она вистинското“. Таквото решение можеби е оправдано за земји во кои владее правната држава и во кои состојбите во медиумите не се толку оптоварени со партиско и со политички влијание како кај нас.

Некој со право ќе забележи дека во правна држава не би се дозволило националниот сервис да дојде во ситуација на просјачки стап. Меѓутоа, во такви услови потешко се манипулира со содржините кои се нудат. Вака, кога платите на вработените и се' друго поврзано со работењето зависат од волјата на врхушката на власт и од парите од буџетот, многу е полесно да се креира програма која е по волја на власта.

Во околности како нашиве, голема е опасноста стечајот на МРТ да се претвори во уште еден инструмент за целосно партизирање на јавниот сервис. Според сценариото кое кружи во оптек во јавноста, вработените ќе бидат отпуштени, а потоа, демек, во новата „Радиотелевизија на Македонија“ ќе бидат примени само најстручните. Но, стручноста кај нас, за жал, најчесто има партиски предзнак, а не објективност, непристрасност и професионалност во работењето.