Претходен број

Владата и ВМРО-ДПМНЕ бараат Заев да го открие министерот што вршел притисок

Не верувам дека некој би презел нешто во систем што функционира под директива на една партија, одговара Заев

Светлана Унковска

Случајот со аболицијата на градоначалникот на Струмица, Зоран Заев, добива се' пошироки димензии, особено откако тој во јавноста изнесе детали од притворањето, за што рече дека e добро монтиран процес и за негов политички линч. Како реакција на обвинувањата, вчера генералниот секретар на ВМРО-ДПМНЕ, Мартин Протоѓер, до него упати отворено писмо во кое тој го обвинува струмичкиот градоначалник дека со своето однесување го руши системот на државата и институциите и дека сето ова е само дел од сценариото за негов избор за лидер на СДСМ.

Протоѓер во писмото бара од Заев да каже кој му се заканувал од притворското одделение дека ќе заврши во кофа со вода и кој и зошто би сакал да го елиминира. На прашањата се надоврза и вицепремиерот задолжен за евроинтеграции, Ивица Боцевски, кој од струмичкиот градоначалник бара да каже со име и презиме кој министер вршел притисок врз судството за да биде донесена одлука за негов притвор.

На сето ова Заев вели дека нема да му одговара никому, затоа што имињата им биле добро познато, а и поради тоа што „не верува дека некој би презел нешто во систем што функционира под политичка директива на една партија“.

„Како генерален секретар на најголемата партија во државата, заради заштита на вистината, правниот поредок и имиџот на земјата, инсистирам на одговор на прашањето - кој ви порача дека ќе завршите во кофа со вода? Ова што го изјавувате упатува на тоа дека некој ви се заканувал со убиство? Кој е тој? Кажете име и презиме за да може институциите на системот да реагираат. Дали навистина постои некој што ви се заканувал или и ова е дел од сценариото на СДСМ?“, го прашува Протоѓер струмичкиот градоначалник Заев откако тој завчера обвини дека добил заканувачки пораки дека ќе заврши во кофа со вода како новинарот Таневски.

За обвиненијата на Заев дека во неколку наврати било планирано убиство врз него, Протоѓер бара тој да одговори во кого ��е сомнева и зошто некој би сакал да го елиминира, а доколку не го каже тоа, ќе смета дека тој лаже или, пак, дека би можело да се работи за закани поради нерасчистени сметки во СДСМ од случајот „Глобал“.

„Вие, г. Заев, само ги потврдувате нашите сомнежи дека сето ова е договор да ве аболираат од кривичната одговорност за криминал тежок осум илјади евра, а притоа да излезете жртва на системот. Лошо сценарио“, стои во отвореното писмо на Протоѓер упатено до Заев. Во него на повикот на струмичкиот градоначалник за ТВ-дуел со премиерот, генералниот секретар на ВМРО-ДПМНЕ му порачува да не ги повикува институциите на дуел, затоа што, како што вели, „за кривично дело не се расправа на ТВ-дуел, туку пред судот и институциите“.

Во писмото Протоѓер му сугерира на Заев да ја докаже својата невиност пред институциите, а не институциите на судството да ја докажат неговата вина.

Одговарајќи на отвореното писмо, градоначалникот Заев кратко наведува дека со ова ВМРО-ДПМНЕ само го покажувало сценариото со кое сака во јавноста да креира негативно мислење за него и за неговата партија и кон сите оние што мислат различно од актуелната власт.

„Со самото обраќање како генерален секретар на политичка партија, а не како вработен во институциите на системот, уште еднаш се потврдува дека, не независните правосудни органи, туку ВМРО-ДПМНЕ се става во функција на судија во државата. Затоа само уште еднаш ќе ви повторам, доколку никој од повиканите не ја прифати дебатата пред јавниот македонски суд, ќе биде потврден политичкиот прогон на Заев, а јас со тоа повеќе нема да коментирам за овој случај“, се вели во реакцијата на струмичкиот градоначалник.

И вицепремиерот за евроинтеграции, Ивица Боцевски, со прашање до Заев - кој е министерот што вршел притисок врз судството во неговиот случај?

„Во името на Владата, го повикувам Зоран Заев да посочи точно кој министер интервенирал во судот и другите органи. Доколку не го открие името на министерот, ќе сметаме дека ова е само продолжение на гнасното сценарио во режија на господинот Бранко Црвенковски“, изјави Боцевски.

„Тие многу добро знаат кој министер им се јавуваше на телефон на судиите. Тоа може многу лесно да се провери доколку се побара увид во деталните телефонски сметки на судиите. Немам намера да одговарам на вакви прашања, затоа што не верувам дека ќе се преземе нешто во ситуација кога системот функционира под политичка директива на една партија“, вели Заев.