Крвав грабеж на бензинска пумпа во Пробиштип

Вработен на пумпата им се спротивставил на двајцата разбојници, по што го раниле

Крвав грабеж на бензинска пумпа во Пробиштип. Двајца оружени разбојници го раниле вработениот на пумпата, кој им се спротивставил. Со три куршуми во телото, 44-годишниот маж е префрлен на лекување во штипската болница, додека ограбувачите ги зеле парите и побегнале. По нив се трага.

Како што соопшти полицијата, инцидентот се случил во неделата околу 19,45 часот на бензинската пумп�� на „Макпетрол“ на излезот од Пробиштип.

„Две маскирани лица, вооружени со пиштол, побарале од вработениот И.Ј. (44) да им даде пари, но бидејќи тој се спротивставил, еден од ограбувачите испукал три куршуми кон И.Ј.“, соопшти МВР.

Двајцата разбојници ги зеле парите од дневниот промет и побегнале. Ранетиот маж бил пренесен во Медицинскиот центар во Штип. Лекарите констатирале дека пациентот бил ранет во стомакот, рамото и во потколеницата. Укажана му била лекарска помош и тој е задржан на лекување во болницата. Од полицијата велат дека се трага по напаѓачите. (Г.А.)