Детска евровизија
Боби Андонов со „Прати ми СМС“ патува на Кипар
Со своите 14 години тој веќе зборува четири јазици, а уште од седумгодишна возраст се занимава со танц
Четиринаестгодишниот Боби Андоновски во саботата вечерта (20 септември) со телевоутинг беше избран да ја претставува Македонија на детската Евровизија, што годинава ќе се одржи во Лимасол, Кипар, на 22 ноември. Песната „Прати ми СМС“, што ја напиша и изведе Боби (автор на аранжманот е Јован Јованов), победи во конкуренција на уште 11 песни, кои македонскиот аудиториум имаше можност да ги слушне со посредство на преносот на МТВ.
Боби Андонов е роден на 18.8.1994 година во Мелбурн, Австралија, и неговата амбиција е да порасне во нов Тоше, што го докажува со речиси идентичната интерпретација на англиската верзија на евровизиската песна на Тоше „Life”.
Инаку, Боби не е дебитант на музичката сцена, особено на детските фестивали. Тој настапувал на неколку фестивали за деца во Македонија, но и во Србија и во Албанија. Тој ја изведе и македонската химна на фудбалскиот натпревар Македонија - Холандија. Со своите 14 години тој веќе зборува четири јазици, а уште од седумгодишна возраст се занимава со танц. Во Австралија, Боби ја има изведувано улогата на Симба во мјузиклот „Кралот лав“. Од саботата негов најактуелен предизвик станува детската Евровизија што ќе се одржи во Кипар. |
