Претходен број

Двајца градежни инженери во решавачка битка за Велес

Аце Коцевски беше на дофат да добие трет мандат уште во првиот круг, а сега почнува се' одново

Славица Ќучукова – Николова


ВЕЛЕС - Жестока битка за градоначалничката фотелја во вториот круг од локалните избори ќе се води во срцето на Македонија - во Велес. И за двете политички гарнитури Велес е многу важно место, за едните оти досега не владееле со него, за другите оти тој им носеше сигурна победа. Рововска борба ќе се бие за секој поединечен глас, оти можеби токму тој ќе биде пресуден дали прв човек на градот ќе стане Аце Коцевски, кандидат за градоначалник од ЛДП, поддржан од СДСМ и НСДП, или Горан Петров, кандидат за градоначалник од ВМРО-ДПМНЕ и коалиционите партнери.

На овие избори Коцевски ќе го побара од велешани третиот мандат, Петров првпат ќе се обиде да стане градоначалник. По првиот круг и двајцата се убедени дека ќе седнат во градоначалничката фотелја. Коцевски смета дека предноста што ја имаше во првиот круг од 1.642 гласа во вториот ќе се зголеми, за Петров таа е достижна и е убеден дека во вториот круг ќе го порази Коцевски.

Двајцата градежни инженери ќе ја бијат битката за Велес со иста диплома, но со различни идеологии и политички концепти што треба да се стори за градот. Отворањето нови работни места ќе биде приоритет за Петров, но смета дека тие можат да се случат доколку се афирмираат компаративните вредности на градот во однос на другите општини, како што се стратегиската положба, близината на автопатот и аеродромот, реката Вардар како реципиент и електричната пруга. „Мојата политичка филозофија ќе биде да бидам градоначалник на сите, ќе ги повлечам сите тужби кои ги поведе градоначалникот пред Уставен суд за неговиот совет, ќе ја отворам општината за граѓаните, ќе воведеме бесплатна телефонска линија на која граѓаните ќе може да ги кажуваат своите проблеми, општината ќе и' стане активен партнер на Владата“, објаснува Петров.

В ели дека ќе ја направи општина Велес да стане посакувано место за бизнисмените оти ќе ги намали сите локални давачки, на инвеститорите ќе им ги промовира постојните и ќе изгради нови индустриски зони по течението на реката Вардар, а купувачите ќе ги ослободи од комуналии за градежното земјиште.

И за Коцевски врвен приоритет е намалување на сиромаштијата, односно решавање на невработеноста. Се надева оти општините во следниот период ќе станат помалку децентралзирани и ќе имаат повеќе пари. „Ќе ги доизградиме постојните и ќе изградиме нови индустриски зони. На местото на топилницата ќе изградиме нова зона за лесна незагадувачка индустрија. Локациите за индустриските објекти ќе ги продаваме по едно евро за квадратен метар, а странските и домашните инвеститори ќе ги ослободиме од комуналии. Ќе изградиме нови водоводни и канализициони системи, пречистителни станици, патишта и улици во повисоките делови на градот, пешачка патека до железниот мост, надвозник меѓу градскиот и младинскиот парк“, ветува Коцевски.

И двајцата сметаат дека треба да се подобри квалитетот на живеењето, но имаат сосема спротивни ставови. Коцевски смета дека Велес никогаш не бил поубав и почист, но вели дека секогаш може да се направи подобро. „Јас тврдам дека затоа што немам обезбедување, сам си ги пишувам говорите и не вработив партиски луѓе во администрацијата годишно на велешани сум им заштедил по околу два до три милиони денари“, вели Коцевски.

Петров смета дека во изминативе години Велес морал да биде поубаво место за живеење. „Ако некој е задоволен од сегашниот лик на градот, тоа значи дека има многу ниски критериуми за сопствениот град. Ние ќе го направиме Велес многу поубав, но не само на главната улица туку и во повисоките делови на градот“, вели Петров.

Коцевски ја имаше можноста на велешани да им се претстави на два големи централни митинзи, на оној на СДСМ и на оној на ЛДП, затоа што е заеднички кандидат. Петров во изборната кампања ја доби поддршката во Велес од речиси сите министри во Владата и премиерот Груевски. Петров вели дека на секоја демократска држава и' била потребна промена.

Велешани се поделени околу прогнозите кој ќе биде новиот градски татко. Едни сметаат дека ниту еден друг градоначалник кој досега го имал Велес нема направено повеќе за градот, други пак дека во Велес се граделе само тротоари и фонтани.

Во првиот круг од овие локални избори Коцевски освои 13.306 гласа, или 49 отсто од оние што излегле на гласање. Петров ја доби поддршката од 43 проценти од граѓаните кои гласале, или11.661.