| ДИК заврши со приговорите
Државната изборна комисија до вчераутро го заврши разгледувањето на приговорите од партиите од првиот изборен круг и усвои по три приговори од СДСМ и од ВМРО-ДПМНЕ и уште еден од ДУИ. До Управниот суд, пак, преку ДИК се поднесени 18 тужби, од кои девет се од Нова демократија, пет од ВМРО-ДПМНЕ, три од коалицијата на ВМРО-ДП - ТМОРО-ВЕП и една од група избирачи В.Ц. од Охрид.
СДСМ денеска ќе поднесе тужби за сите пријави кои ДИК ги одбил и тоа три за Демир Капија, четири за Долнени, седум за Кочани, 39 за Ѓорче Петров, 26 за Аеродром, по едно за Виница, Брвеница и Јегуновце. СДСМ ќе поднесе тужба до Управниот суд и за усвоените приговори на ДУИ за Маврово- Ростуше и на ВМРО-ДПМНЕ за Берово.
Со усвоените приговори од ВМРО-ДПМНЕ, ДИК ги поништи гласањата на две избирачки места - 2353 во Општина Студеничани и 0248 во Општина Македонски Брод. На изборното место во Студеничани, поради лошите временски услови и оддалеченост од еден километар до гласачкото место, жителите на Долно Количани не можеле да дојдат на гласање, поради што гласањето е поништено, додека во Македонски Брод бројот на гласачките ливчиња во кутијата не соодветствувал со бројот на излезените гласачи. Сепак, и покрај одлуката за поништување на изборите во овие места, Комисијата деновиве ќе одлучува дали таму ќе има прегласување.
По приговорот на ВМРО-ДПМНЕ за избирачкото место 0259 во Македонски Брод е извршена исправка на бројот на неважечки ливчиња, каде што од вкупно 15 неважечки ливчиња, седум биле важечки.
Од поднесените приговори на СДСМ, ДИК прифати пребројување на гласовите на сите избирачки места во Тетово по кое е утврдено дека за СДСМ се изброени помалку гласови. Со ова СДСМ добива уште еден член во Советот на Тетово. (Св.У.) |
