Битолската млекарница ќе произведува и млеко со флуор
Битолската млекарница веќе од идниот месец ќе започне со производство на млеко збогатено за флуор. Новиот вид млеко ќе се произведува по иницијатива на Министерството за здравство, а со поддршка на Фондацијата „Боров“ од Англија, како дел од национална програма за орално здравје кај децата, во која ќе бидат опфатени сите деца до 14-годишна возраст.
Флуорираното млеко, како што најави првиот човек на Фондацијата, г. Најџел Боров, ќе се дистрибуира во сите детски градинки во земјата. Во првата фаза ќе бидат опфатени околу 30.000 деца, а следниот чекор е млеко со флуор да пијат сите деца на возраст до 12 години. Целта на овој проект е видливо намалување на кариесот кај децата, зашто епидемиолошките податоци покажуваат дека кај нас децата имаат и по седум расипани заби во устата. (Ј.Ј.) |
