И Бичиклиски на суд за судир на интереси

Функционерите во локалната власт ги сакаат привилегиите, а ги игнорираат обврските

Катица Чангова


И Александар Бичиклиски, член на Советот на Град Скопје, се наоѓа на листата функционери во локалната власт кои ќе бидат повикани на суд поради непополнета изјава за судир на интереси. Роковите за обврската минаа, па затоа Антикорупциската комисија одлучи да поднесе прекршочни пријави и за 14 колеги на Бичиклиски, скопски советници.

Советот на главниот град е најголем и има 45 члена. Поради потфрлање во отчетноста и транспарентноста, со казна од 1.000 до 3.000 евра се соочуваат и Марјан Додовски, Ѓорѓе Марјановиќ, Есма Реџепова -Теодосиевска, Слободан Угриновски... Тоа се однесува и за Бранислав Саркањац, советник во Општина Центар, кој е еден од четворицата функционери меѓу вкупно 23 кои затаиле со оваа должност.

Измените на Законот за судир на интереси предвидоа задача за носителите на јавни функции, односно тие да пополнат и изјава на интереси, покрај задолжителниот формулар за имотната состојба. Службените лица од законодавната, извршната, судската и локалната власт во тој лист треба да напишат дали се членови на управни и надзорни органи, здруженија, фондации, потоа дали покрај јавната функција водат и сопствен бизнис, а треба да откријат и детали за ангажманот на нивните блиски роднини.

Се чини дека локалните функционери повеќе ги сакаат привилегиите од обврските. До Државната комисија за спречување на корупцијата заклучно со 14 септември од вкупно 1.384 советници, изјави за интереси доставиле 677 советници. Или вкупно 432 од нив не пополниле формулари за интереси.

Анализата на Антикорупциската комисија покажува дека 20 совети од вкупно 85, каде што е вклучен и Советот на Скопје, целосно ја исполниле обврската. Меѓу лошите примери за транспарентност се вбројува и штипскиот Совет, во кој од 23 советници, изјавата за интереси ја пополнил само еден советник. Во скопските општини Сарај и Чаир, на обврската заборавиле 18 од 19 советници, односно 21 од вкупно 27 члена на Советот. Ниту еден советник во општините Карбинци, Градско и Сопиште не пополнил изјава за интереси. Ситуацијата е разочарувачка и во општините Валандово и Зајас, каде што само по еден советник од вкупно 15 во секој совет завршил со обврската.

За нетранспарентните функционери, Државната комисија за спречување на корупцијата заклучи да поднесе барања до надлежниот суд за поведување прекршочна постапка. Глобата што се изрекува за ваков вид прекршок е од 1.000 до 3.000 евра во денарска противвредност. Ако казните се изречат и се наплатата, тогаш буџетот на антикорупционерите ќе се наполни со околу еден милион евра.