Поглед

Од воз - на лекар

Сања Наумовска

„Македонски железници - Транспорт“ се подготвува да продава билети за воз преку Интернет. Компанијата фаќа чекор со европските трендови. На своите клиенти ќе им понуди нова услуга што треб�� да ги привлече што почесто да ги користат возовите како превозно средство. Нема потреба од трчање и чекање редици по шалтери. Во иднина, возниот ред, дестинациите и билетите ќе бидат достапни на интернет-страницата на компанијата, па се' ќе може да се заврши и од дома.

Одлична идеја на „МЖ - Транспорт“. Конечно, ред беше и нашите патници да се почувствуваат европски. Со оглед на тоа дека најчести патници во возовите се студентите, потегот на компанијата, веројатно, и ќе си ги даде очекуваните резултати. Но, ако се олесни купувањето карта, не значи и дека ќе се подобри железничкиот превоз. Прастарите возови се нечисти, неудобни, небезбедни, а од друга страна, и пребавни.

Седнување во македонски воз е ризик за секој патник. Зиме смрзнувачка, лете - пекол. Нема ниту парно ниту климатизација. Прозорците заглавени, провев од сите страни. Од Скопје до Битола гарантирано ви изѕемнуваат нозете, а до Гевгелија, пак, се добива запаление на уво. До Белград, којзнае што. За подалеку и не знаеме, бидејќи нашите петдецениски возови се заглавени на Балканот. Во Европа не можат, освен ако не треба да ги изложат во некој историски музеј.

Услугата во железницата е комплексна и бара огромна инвестиција, за која мора да размислува и компанијата, но и Владата. Итно треба да се купат нови патнички вагони и локомотиви и да се обезбеди достоинствен превоз за македонските патници. Ако не, пак, „Македонски железници“ нека почне да размислува заедно со билетот да дели и специјалистички упати.