Само професионалците се добри дипломати

Амбасадорката на Холандија во Македонија, Симоне Филипини, смета дека само професионалците се добри дипломати и оти тоа правило треба да го почитуваат уште повеќе малите земји, како што се нејзината и Македонија. Според неа, Холандија моментно има само еден политички именуван амбасадор, но и тој бил избран, бидејќи се покажал како најстручен за таа позиција.

„Политичарите имаат проблем да бидат неутрални. Тие повеќе работат за себе отколку за националните интереси“, рече Филипини на собирот организиран од Клубот на македонските дипломати. Од македонска гледна точка, многу футуристички беше нејзиниот опис каков треба да биде дипломат на мала земја, за да биде успешен и да ги турка интересите што се зацртани.

„Салонската дипломатија, со гламурозни коктели и пишување извештаи од канцеларија веќе не постои. Дипломатите сега треба да загазат во калта, да рашират мрежа на контакти како пајаците, да имаат пристап до соговорниците, да бидат транспарентни. Тие треба да бидат многу интелигентни и продорни, да одат на стратегија ’win-win‘. Треба да имаат јасно зацртана цел и да се фокусираат на неа“, порача таа. Според неа, во Холандија дипломат може да биде само некој што има завршена магистратура и исклучителни вештини.

„Нашите дипломати сега имаат фантастични СВ, зборуваат повеќе јазици и кога ќе дојдат веќе направиле многу нешта. Нивните способности се проценуваат секоја година и уште во почетокот им се кажува кој ќе напредува по брзата лента, а кој по бавната, но нивното напредување е најобјективно што може“,информираше амбасадорката. Сликовито таа заклучи дека во современата дипломатија амбасадорите се „слободно движечки објекти во странство“, па како такви се лицето на земјата или нејзината „бизнис-карта“. На прашањето која е разликата меѓу дипломатијата на мала и богата земја и таа на мала и сиромашна, Филипини одговори дека ако си богат можеш да си дозволиш повеќе амбасади, а ако не си, не можеш да ја платиш сметката. Затоа, препорача таа, фокусот треба да биде на кадарот и на приоретизирање на целите, или како што рече, за таа дипломатија главно е правењето избор. (С.Ј.)